Balseiro supervisa o funcionamento do mando avanzado que a Axencia de Emerxencias de Galicia desprazou a Viveiro con ocasión do Resurrection Fest

Viveiro (Lugo), 8 de xullo de 2017.- O delegado territorial da Xunta en Lugo, José Manuel Balseiro, trasladouse ata a localidade de Viveiro para supervisar o funcionamento do operativo posto en marcha pola Axencia Galega de Emerxencias (Axega) dependente da Vicepresidencia e Consellería de Presidencia, Administracións Públicas e Xustiza, co ocasión do Resurrection Fest, unha das citas máis multitudinarias da comarca.

O operativo principal está composto polos vehículos que integran o Posto de Mando Avanzado, un dos recursos propios da Axega, entre eles un camión articulado –valorado en máis dun millón de euros- que permite trasladar ao lugar da incidencia unha sala de operacións, coordinación e xestión de recursos. Está dotado coa última tecnoloxía, o que garante as comunicacións aínda nas condicións máis adversas.

O camión de tipoloxía 6×6 mide 10 metros de largo, 4 metros de altura e 5 de ancho -na súa modalidade despregada- e dispón unha escaleira de acceso. Entre o seu equipamento figura emisoras de diferentes bandas de frecuencia, entre elas, banda mariña, aérea, baixa, HF, e satélite, integradas no sistema de comunicación TETRA.

O operativo é autónomo de calquera fonte eléctrica grazas aos dous xeradores cunha autonomía individual de 150 horas de funcionamento cada un deles. A alimentación de combustible realízase a través do depósito do camión cunha capacidade de 300 litros.

Balseiro puxo en valor que a Xunta de Galicia quixo colaborar coa organización do festival, co Concello de Viveiro e a agrupación de Protección Civil, para ofrecer unha resposta especializada ante emerxencias e situacións de risco e, en todo caso, para garantir a seguridade de todos os asistentes.

O delegado territorial interesouse tamén polo desenvolvemento do operativo e recibiu información de primeira mán dos efectivos de Emerxencias e Protección Civil, Policia Nacional e Local e da Garda Civil. Ao longo da xornada contabilizáronse 148 incidencias de diversa consideración, a única de gravidade, unha rotura de tibia. Todas foron coordinadas desde o posto de mando desprazado pola Xunta. A cifra é moi baixa se temos en conta que no principal dia de actuacións achegáronse máis de 20.000 persoas. Balseiro felicitou aos integrantes do operativo de seguridade polo seu traballo e demostrada profesionalidade.