A plataforma na defensa da sanidade pública da Mariña demanda o mantemento da área sanitaria da Mariña

A Mariña, 25 de Agosto 2017. A Plataforma na Defensa da Sanidade Pública da Mariña, constituida por colectivos sociais e veciñais e organizacións sindicais e políticas, vén de reunirse para analizar e valorar as consecuencias que vai traer consigo a modificación da Lei 8/2008 de Saúde de Galicia. Desde a Plataforma advirten que con esta reforma lexislativa desaparece a Área Sanitaria da Mariña e camiñase cara á centralización en Lugo da maior parte dos recursos sanitarios e humanos e sen ningún poder de decisión a nivel da comarca, e con esta modificación a planificación da asistencia sanitaria vai facerse en función dos recursos sanitarios existentes, e non en función das necesidades sanitarias da Comarca,mermando a asistencia ao non dotarse de máis recursos. Advirten tamén que con esta modificación da Lei posibilítase a mobilidade forzosa de especialistas e resto de profesionais sanitarios da Mariña, que pasarán a pertencer á area de Lugo, legalizando deste xeito a centralización da sanidade en Lugo e o desmantelamento de especialidades na nosa Comarca.

A Plataforma demanda o mantemento da Área Sanitaria da Mariña para garantir a eficacia e a continuidade da atención sanitaria en condicións ópitmas, desenvolvendo unha xerencia próxima, coñecedora das necesidades de saúde e de planificación e xestión asistencial, poñendo en valor o Hospital da Costa e dotándoo do persoal, material e tecnoloxía necesarios para unha atención adecuada ás persoas.
Así mesmo propoñen poñer en marcha un plan de mellora da Atención Primaria, pilar básico do sistema sanitario, e dotándoa tamén dos recursos económicos, técnicos e humanos precisos.

A Plataforma inicia unha campaña informativa con actos nas principais vilas.

Nas vindeiras semanas a Plataforma na Defensa da Sanidade Pública da Mariña levará a cabo unha campaña informativa, dirixíndose a toda a sociedade mariñá, con actos nas principais vilas e distribuindo información tamén en centros de traballo e locais públicos. Desde a Plataforma dirixiranse tamén a todos os concellos da Mariña para pedirlles o apoio a estas reivindicacións, solicitándolles que penduren nas súas fachadas pancartas de apoio. Desde a Plataforma presentarán tamén mocións en todos os concellos.