Coa charla sobre A Formación Profesional en Alemaña deu comezo en Ribadeo o VI Fórum de Innovación e Formación sobre Vehículos, que organiza a Asociación de Profesores de Automoción de Galicia

Paul Gliet e Jörg Grube explicáronlles aos empresarios asistentes o funcionamento do sistema dual en Alemaña, país no que hai máis de 350 carreiras recoñecidas de FP e onde todos os anos xurden algunhas novas, atendendo así a demanda das empresas. Segundo os poñentes é moi difícil atopar un bo traballo en Alemaña sen FP e subliñaron que o sistema dual é tradicional e que funciona moi ben desde hai moitos anos. Por exemplo un contrato de aprendiz, que pode ter unha duración máxima de 3 anos e medio, suporá un total de 40 horas semanais de traballo, das que entre 28 e 32 serían de prácticas na empresa e de 8 a 12 no instituto de FP. O máis habitual en Alemaña é que un aprendiz pase 3 ou 4 días á semana na empresa e 1 ou 2 no instituto.