O Valadouro, 10 de agosto de 2017. Ante o nacemento no noso val dun colectivo de pais e nais para a reivindicación do servizo pediátrico nos centros de saúde de Alfoz e Ferreira, o BNG local desexa, en primeiro lugar, felicitar os responsábeis da devandita iniciativa e facer pública a solidariedade que encontrarán sempre nos militantes e cargos públicos da organización.
En segundo lugar, o BNG desexa reiterar o seu compromiso coa loita pola recuperación do servizo de pediatría no val, servizo que xa era exiguo en si, pois o facultativo en cuestión atendía a consulta dous días á semana, un día en cada concello; mais, desde hai anos, este servizo foi eliminado nos dous centros de saúde (Ferreira e Alfoz), e os nenos enfermos deben ser desprazados até o centro de saúde de Foz (a 15 qm de distancia).
En terceiro lugar, o BNG quere manifestar que o seu compromiso con esta reivindicación non comezou agora senon no mesmo momento en que os centros de saúde locais ficaron sen médico-pediatra, pois o BNG presentou mocións ao respecto en 2009 e 2014.
Tamén, queremos lembrar que o día 1 de xullo, a parlamentaria autonómica Olalla Rodil visitou O Valadouro para coñecer de preto esta e outras problemáticas locais. Nesta visita, a deputada do BNG por Lugo comprometeuse a facer unha pregunta no Parlamento de Galiza sobre a desaparición do servizo pediátrico no val.
Queremos lembrar que a moción presentada en 2014 fora aprobada por unanimidade nos plenos municipais de Alfoz e O Valadouro; e no seu texto demandábase que ambos alcaldes se puxeran en contacto coa Consellaría de Sanidade para demandar a recuperación do servizo. Tres anos despois, os concellos do val continúan sen servizo de pediatría. A continuación, engádese o texto central da moción aprobada en 2014:
“Na actualidade as familias con fillos en idade pediátrica teñen que desprazarse até Foz para recibir atención médica especializada. Amais de verse obrigados a percorrer a devandita distancia cos nenos enfermos, acontece que en moitas ocasións as citas previas son concedidas para cinco días despois de ser solicitadas.
O feito de non contar con servizo pediátrico no centro de saúde local repercute negativamente, primeiro na atención sanitaria da infancia, pero indirectamente afecta á fixación de poboación no rural, na calidade de vida que ofrecen os nosos concellos a posíbeis novas familias, e en definitiva a un saldo demográfico negativo que afecta a Alfoz e O Valadouro desde hai décadas. É dicir, o feito descrito, necesariamente vai desanimar a aquelas persoas que desexen criar fillos nas parroquias do val, xa que unha carencia tan importante, obrígaos a establecerse nos concellos onde os nenos poden recibir atención sanitaria especializada sen saír do límite municipal.”
Do mesmo xeito, o BNG anima a todos os veciños a asinar os impresos que o colectivo de pais e nais distribuíu por estabelecementos comerciais de todo o val, pois todo xesto, por pequeno que sexa, é preciso nunha reivindicación fundamental para o futuro dos concellos do val.
Por outra banda, parécenos propio de países terceiromundistas que no século XXI debamos estar demandando servizos básicos; algo que semella propio doutras épocas.
Consideramos dun cinismo maiúsculo as mensaxes de compromiso co rural que vén lanzando o Partido Popular desde a Xunta de Galiza, pois en calquera concello rural, no momento en que a administración elimina un servizo fundamental para a sociedade como é a atención médica infantil, a demografía reséntese, e son moitas persoas as que deciden escoller outros lugares para criar os seus fillos.
Por todo isto, o BNG convida os responsábeis da Consellaría a explicar a discriminación á que están sometendo, desde hai anos, o sector máis vulnerábel da sociedade: os nenos.
A deixación, abandono e desleigamento mostrados pola administración autonómica, están a obrigar a moitos veciños a viaxar cos seus fillos enfermos até Foz, cando no val existen dous centros de saúde, infrautilizados.
Asdo.:
Eduardo Chao González
Tenente-Alcalde do Concello do Valadouro
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continúa con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
Finalizado o encontro, de carácter privado, o Cónsul asinou no Libro de Ouro da Deputación e a Presidenta fíxolle entrega dun agasallo institucional. Trala xuntanza Carmela López manifestou a súa satisfacción porque “traballamos para avanzar en novas vías de colaboración, e en posibles proxectos que serven para reforzar a relación entre a Deputación e o veciño país de Portugal”.
