O Goberno da Deputación leva ao Museo a exposición sobre numismática: Moeda das Idades Moderna e Contemporánea

Lugo, 1 de agosto de 2017. A Deputada de Cultura, Pilar García Porto, inaugurou este martes a nova mostra que o Goberno da Deputación leva ao Museo Provincial durante todo o mes de agosto baixo o título de Percorridos pola colección numismática. Moeda das Idades Moderna e Contemporánea. Mediante este proxecto preténdese facer un percorrido pola colección numismática do Museo da capital luguesa dividíndoa en dous grandes bloques: moeda hispánica e moeda estranxeira.

García Porto subliñou que “o monetario do Museo Provincial de Lugo supera as 8.000 pezas, sen contar as 459 medallas. E dado que na exposición permanente só se amosa unha pequena parte, con estas exposicións temporais a base de textos explicativos, gráficos, debuxos e fotografías preténdese achegar esta colección ao público, así como contribuír ao coñecemento da ciencia numismática”.

A exposición que hoxe se inaugurou constitúe a segunda parte do estudo e revisión diacrónico da moeda hispánica. Primeiro expúxose a moeda dende o século III a.C. ata a o século XV, achegando información e imaxes das pezas indíxenas, romanas e medievais ata os Reis Católicos incluíndo as hisponomusulmás e outras moedas senlleiras da época.

E, nesta segunda parte, expóñense as moedas modernas e contemporáneas que establecen un marco cronolóxico dende o S. XVI ata a actualidade. A moeda estranxeira formaría parte da derradeira actuación, é fundamentalmente contemporánea e abrangue países de tódolos continentes.

A mostra permanecerá aberta ao público durante todo o mes de agosto, con entrada gratuíta, en horario de luns a venres: 9:00 a 21:00 horas, os sábados de 10:30 a 14:00 horas e de 16:30 a 20:00 horas, e os domingos e festivos, de 11:00 a 14:00 horas. A exposición consta de: Once lonas de 1.20 x 80 centímetros máis o póster/lona de presentación.

Obradoiro infantil
Mañá, martes, en paralelo á exposición terá lugar no Museo Provincial de Lugo o obradoiro infantil “Acuñando, cuñando”, dirixido a nenos e nenas de entre 6 e 12 anos de idade. Esta actividade xirará entorno á mostra que hoxe se inaugurou e desenvolverase entre as 11:30 e as 13:30 horas, impartida polo comisario da exposición, Enrique Alcorta.