Os socialistas de Ribadeo denuncian a ausencia de pediatría dende o 7 de agosto

En Ribadeo, a vinte e oito de agosto de 2017. Aurora González Ginzo, portavoz do Grupo Municipal Socialista,
DENUNCIA a ausencia da pediatra titular do Centro de Saúde de Ribadeo de forma ininterrompida dende o día sete de agosto ata polo menos o día 18 de setembro sen que se saiba aínda se o SERGAS vai mandar cubrir esta ausencia cun substituto ou substituta ou non, segundo a información que puidemos obter do persoal de dito centro no día de hoxe.
INFORMA de que ven de poñer unha queixa formal perante o responsable desta institución e de solicitar o nomeamento inmediato de substituto ou substituta para cubrir a ausencia da titular da praza ó mesmo tempo que insta á Dirección desta entidade a que poña fin a unha situación que se ven repetindo sen excepción dende hai anos cada vez que a Pediatra Titular fai uso dos permisos e licencias que lle corresponden.
E SOLICITA do grupo de goberno que tome as accións oportunas para facerlle chegar ó SERGAS un comunicado institucional no que se poña de manifesto o malestar da cidadanía deste concello por encontrarse unha vez mais sen atención para os nenos e nenas, que son un dos sectores mais vulnerables da poboación que nesta temporada, ademais, se ve considerablemente incrementado ó afectar non só os habitantes dos concellos de Ribadeo e Trabada, usuarios habituais do servizo, senón tamén a quen visita a zona.