O día da bici de Foz contou con 240 participantes e o club ciclista local doou dous carros con produtos para o banco de alimentos

Foz, 25 de setembro de 2017. O Día da Bici celebrado este pasado sábado en Foz contou con 240 participantes e o club ciclista local doou dous carros con produtos para o Banco de Alimentos focense.

Dende a organización manifestaron: “Grazas a todos/as os/as participantes, un total de 240 este ano. Sabemos que algúns non puideron estar, pero contamos con eles/as para o ano que vén. Grazas ao Club Ciclista Foz, Motos Baltasar, Gadis e Froiz, por colaborar neste día tan especial para moitas familias. O Club Ciclista ademais doou dous carros con produtos para o Banco de Alimentos. Prometíamos algunhas sorpresas e así foi. Cada participante levou a súa camiseta conmemorativa, un inchable estaba a esperar polos/as ciclistas no avituallamiento, da man de IG10, e ao final, entre outros regaliños, sorteamos unha bicicleta”.

Tamén explicaron que “os trofeos foron para: ao máis veterano, Emilio Suárez Morán; ao máis novo, Roi Rodríguez Oliveros; bici mellor engalanada, Lucía Pardo Vázquez; mellor disfrace, Elena Castro Sanjurjo; e xa goza dunha espectacular bicicleta nova Hugo Méndez Prieto”.

Entre os asistentes ao evento estiveron o alcalde de Foz, Javier Jorge Castiñeira; a concelleira de Deportes, Mercedes González Alonso; e o edil de Cultura, Ánxel Paleo Soto.