A Escola Infantil e a disputa infantil.

Nas última datas recibimos a visita, sen previo aviso, do presidente da Xunta de Galiza para inaugurar á nova Escola Infantil.
Como de costume, tanto nas filas populares como nas socialistas, incluído o alcalde, foron correndo a render pleitesía a Núñez Feijóo. Da a impresión que el nos regala este servizo ós veciños de Burela, como se os orzamentos de concello e Xunta non dispuxeran dos cartos de todos. Non debemos nada a ninguén.
O caso é que a Escola Infantil chega tarde, mal e arrastro. Tarde porque a apertura se retrasou dous anos debido á incompetencia de PP e PSOE á fronte das administracións públicas.
Mal porque debido á política de recortes do PP, quen eliminou o Plan Educa3, no que este tipo de obras se financiaba a partes iguais entre o Ministerio de Educación e a Xunta, o concello tivo que asumir o 40% da obra e ceder os terreos polos que pagou 90.000 €. Unha ruina para as veciñas e veciños de Burela, debido a que a Xunta descarga na administración local, as súas propias competencias.
Neste intre é bo recordarlle ó señor Barcia, quen no pasado pleno falaba de que o primeiro paso para facer unha obra dese tipo é contar con terreo e un proxecto, que para á construcción do Hospital da Costa foron os veciños os que cederon os terreos sobre os que agora se constrúe un aparcadoiro que o voceiro popular xa confirmou que vai ser privado.
E arrastro porque a ubicación desta nova instalación non é apropiada, con beirarrúas moi estreitas, nunha rúa con bastante tráfico e moi cerca da vía ferroviaria.
O alcalde de Burela mostrábase moi combatente coa administración autonómica cando entrou no poder, pero máis alá de asumir á execución de obras que a Xunta deixou sen facer, non mudou nin un centímetro o camiño que lle marcou a Xunta.
No pasado pleno do concello de Burela debatíase o convenio para a xestión da nova gardería. Para isto o BNG creara o Consorcio Galego para o Benestar e os Asuntos Sociais co obxectivo de regular este tipo de servizos. O PP foi moi crítico no seu momento con este ente, pero dende que nos goberna Feijóo botou man del ignorando os principios cos que se creou. Iso non o di o voceiro do BNG en Burela. Iso dino os informes de secretaría que analizan o convenio enviado pola Xunta e son claros e contundentes: a Xunta vulnera a súa propia norma, o convenio susténtase nun acordo entre á Xunta e á Fegamp polo que se violan os estatutos do propio Consorcio e mesmo se dubida da constitucionalidade da Ley 2/2017 do 8 de Febreiro que dende este ano regula este tipo de acordos.
Ante isto, Alfredo Llano, lonxe de escoitar ós técnicos municipais e defender o interese dos veciños de Burela, propuxo aprobar un convenio de xestión que obriga ó concello a aportar económicamente máis alá do mantemento.
O señor Llano deu as costas ós veciños de Burela e sitúase como cómplice da Xunta nesta nova ruina que recae sobre os burelaos.
Para colmo, os veciños teñen que asistir a disputa pública entre PP e PSOE para ver quen trouxo a Escola Infantil a Burela. Como se non pagasen os veciños. Como se non pagasen de mais grazas á incompetencia de populares e socialistas.
Unha disputa infantil para unha Escola Infantil.