O día 5 de decembro abrirase ao público o belén “Viveiro ante o berce” e procederase ao encendido do alumeado de nadal

Viveiro 28-11-17. Coincidindo co inicio da ponte festiva de decembro, o Concello de Viveiro procederá ao acendido do alumeado de Nadal e á apertura ao público do Belén “Viveiro ante o Berce”, que se celebrará ofrecendo unha chocolatada con churros a todos os asistentes.
Con respecto ao Belén, cómpre sinalar que poderá visitarse, no atrio da Igrexa de Santa María, ata o 14 de xaneiro. Este Belén, a tamaño natural, está considerado como un dos máis importantes de Galicia e destaca pola súa beleza, pola dimensión das súas pezas, pola extensión do seu conxunto e por instalarse nun enclave histórico-monumental único.
Pode considerarse como un dos referentes do Nadal galego e dende o concello constátase como cada ano se incrementa o número de visitantes, sendo frecuente recibir chamadas de asociación ou centros educativos, tanto de Galicia como de fóra de Galicia, pedindo información para organizar excursións co fin de visitalo.
Con respecto ao alumeado de Nadal, en 2015 o concello adquiriu as luces de led coas que se decoraron as rúas Pastor Díaz e Margarita Pardo de Cela, resultando que esta nova iluminación tivo grande acollida. En 2016, comprouse outro pequeno tramo de luces coas que se ampliou este tipo de iluminación na Porta de Carlos V. Dende o o primeiro momento, a intención do concello é ir adquirindo, dentro das posibilidades económicas, máis tramos deste alumeado para incrementar a decoración noutras zonas e rúas, sendo conscientes de que a decoración de Nadal é unha inversión que contribúe a dinamizar a cidade, creando a ambientación propia destas datas e favorecendo tanto as compras como o turismo.
Neste 2017 e grazas o aforro que supuxo non ter que alugar cada ano todas as luces da decoración navideña, o concello aumentará as zonas con iluminación de nadal grazas á adquisición de máis luces de led; serán, en concreto, a rúa Almirante Chicarro e a Avenida de Cervantes, onde se colocará, á altura da Pescadería, unha gran rede de luces de led. Este ano, ademais, alugáronse arcos de luz para adornar a Praza de Juan Donapetry, Cantarrana, Covas e Celeiro, co fin de dinamizar tamén estas zonas.
Dende o concello consideramos que tanto o Belén “Viveiro ante o Berce” como o alumeado de Nadal son dous elementos fundamentais para crear o ambiente propio do Nadal, resultando ser en ambos casos importantes dinamizadores dende un punto de vista económico e turístico.