O equipo de goberno de Lourenzá proponlle á Xunta varias obras a realizar no Concello

Lourenzá, 15 de novembro de 2017. O equipo de goberno de Lourenzá agradécelle ao PP local as xestións realizadas ante a Xunta de Galicia para reparar o peche e a beirarrúa da área de O Ranchito. Tamén colle con satisfacción e sorpresa a celeridade con que a Xunta atendeu a súa petición. É por iso que “co afán de colaborar procedemos a darlles un listado de obras para que llo trasladen á Xunta de Galicia e ao señor Balseiro e que procedan tamén a reparalas á maior celeridade”, explica o goberno municipal.

Os membros do equipo de goberno de Lourenzá especifican que “poden comezar polo CEIP Juan Rey. O ascensor, de recente instalación, non funciona cando chove porque colle auga. Os radiadores, inspeccionados hai poucos meses polo señor Balseiro e a señora Álvarez Chao, cando viñeron a sacar a foto, non quentan e nalgunhas clases teñen que utilizar estufas. O estado do peche do colexio, ventás e portas, é lamentable, o que fai que a calefacción non se note en días de moito frío. A caldeira tamén necesita ser substituída. O mesmo se pode dicir da instalación eléctrica, que xa non é a primeira vez que arde e bota fume para susto de nenos e profesores. Non sabemos se no PP de Lourenzá se decataron de que ao colexio van máis nenos que ao parque infantil de O Ranchito (todos os veciños que pasan por alí saben quen non hai nunca ningún neno, como tampouco no parque da Gracia nin no de Oural, pero o importante noutros tempos era despilfarrar sementando parques infantís)”.

Ademais o goberno municipal pregunta “por que non sae o señor Balseiro a contar que a Xunta nos denegou a subvención que o Concello pediu para seguir realizando obras de mellora no pavillón polideportivo e mesmo para cubrir as escaleiras de entrada ao colexio e cuxo presuposto ascendía a un total de 52.268,37 euros. Tampouco ven a presumir dos recortes que aplicou a Xunta de Galicia no Plan de Mellora de Camiños Municipais e que supuxo que o noso concello recibise 40.000 euros menos que o ano pasado, case un 60% menos que no 2016. Esas verdades non interesa contalas, a pesar de seren importantes tamén, pero non teñen cabida dentro da estratexia política que se marcou a señora Álvarez. Despois virá o señor delegado a Lourenzá a contar que a Xunta é o organismo que máis inviste no noso concello”.

Os gobernantes locais de Lourenzá engaden: “pasamos ao Centro de Día. Hai uns días publicaban nas redes sociais peperas fotos onde aparecían plaquetas rotas na entrada deste edificio. Como non van estar rotas se colocaron unhas plaquetas de cuarto de baño nunha explanada exterior pola que ten que circular o transporte dos usuarios do citado centro. Encima deixáronas sen rematar. A quen se lle puido ocorrer? Tamén é unha obra da Xunta. Poderiamos seguir, pero con isto cremos que xa teñen para empezar. Por certo, tamén sería de agradecer que o PP de Lourenzá e a señora Álvarez Chao intercederan ante a Xunta de Galicia para que nos concedan algunha das subvencións que lles solicitamos desde o goberno local e non facelo só con aqueles concellos da súa mesma cor política”.