O salòn de actos do Concello de Cervo quedou pequeno no acto homenaxe do centenario das escolas

Cervo 30-12-17. O alcalde de Cervo, Alfonso Villares, agradeceu a Paco Piñeiro o extraordinario traballo xa que “coa súa habitual tenacidade e entrega, logrou recompilar ese universo de nomes, datos e historias para compartir con todos nós”.

Un xesto sen dúbida xeneroso, que nos brinda a oportunidade única de camiñar polas memorias da Parroquia de Santa María de Cervo, descubrindo anécdotas, relatos e ilustres persoeiros que quedarán por sempre ligados á nosa historia.

Tiven a oportunidade de ter nas miñas mans un esbozo deste libro -engadiu- “e ao ler aquilo que xa está escrito sobre o noso pasado, un dase conta de que ás veces buscamos historias, lonxe dos nosos costumes, cando o noso propio relato ten os mellores condicionantes que podamos atopar dentro de calquera xénero literario. E a maiores de todo hai un factor diferencial moi importante. Trátase da nosa historia. Da historia do pobo de Cervo”.

O rexedor sinalou que estas Escolas son o mellor agasallo que nos deixaron os nosos devanceiros; compatriotas emigrados a Cuba ou á Arxentina, que foron testemuñas nas súas propias carnes de que a educación era o mellor pasaporte para o futuro. E é que, tal e como se recolle nesta Crónica, o maior continxente de emigrantes proporciónano aqueles países nos que a cultura pública está atrasada.

Desa ansia de abrir as portas do coñecemento ao seu Pobo naceu a primeiro Grupo Escolar Público do distrito Cervo-Sargadelos. Un legado que temos o deber de conservar e protexer tamén dende as Administracións, promovendo e defendendo unha educación pública de calidade.

Este libro ten que ser unha peza imprescindible nas vitrinas e bibliotecas das nosas casas. Un exemplar que se transmita de xeración en xeración; porque é fundamental saber de onde vimos e o gran esforzo que lles custou aos nosos antepasados conseguir o que hoxe temos.

O que se recade coa venda do libro, editado polo Concello de Cervo, será doado ao Grupo de Teatro O Bordelo como contribución á sua extraordianria labor cultural, e para que sigan a promover e divulgar a súa actividade.

O Concello de Cervo fíxolle entrega a Paco Piñeiro dunha figura de Sargadelos, como xesto agarimoso e en recoñecemento ao seu traballo.