Mondoñedo acolle este xoves unha xornada informativa sobre as axudas da Xunta para a rehabilitación de vivendas

Mondoñedo, 7 de febreiro de 2018.- O Pazo de Santo Tomé de Mondoñedo (antigo centro comarcal) acollerá mañá xoves, ás oito da tarde, unha charla informativa sobre as axudas da Xunta á rehabilitación de vivendas

O delegado territorial da Xunta en Lugo, José Manuel Balseiro convidou a todos os que poidan estar interesados en facer obras nas súas vivendas a asistir ao evento, de acceso libre e gratuíto, e ao que poden sumarse desde propietarios de vivendas ou edificios, a empresas de rehabilitación, técnicos urbanísticos ou arquitectos.

En particular, a xornada centrarase sobre a nova liña de subvencións para as vivendas emprazas nos Camiños de Santiago. Pero tamén abordarán outros apoios promovidos pola Xunta para vivendas particulares e edificios que necesiten reformas.

Os apoios da Xunta para vivendas no camiño de Santiago consisten nunha axudas de ata 15.000 euros por vivenda, dos que 11.000 serán de financiamento estatal e non poderán cubrir ata o 35 por cento do orzamento e 4.000 de financiamento autonómico, co límite máximo do 10 por cento do orzamento. Para este fin o Goberno galego reserva 2,9 millóns de euros.

No caso da Mariña lucense, os concellos beneficiarios son aqueles polos que transcorre o camiño do Norte, en concreto, as parroquias xacobeas de Ribadeo, Trabada, Barreiros, Lourenzá e Mondoñedo. A xornada, en consecuencia, ten carácter comarcal e a ela están convidados as persoas interesadas de todos estes municipios.