O BNG di que a recollida do lixo se incrementou un 10% en 2017 e critica que o Concello de Burela manteña o servizo en mans privadas

Burela, 26 de Marzo de 2018. O PSOE aprobou no pleno extraordinario celebrado hoxe en Burela, a prórroga do contrato para a xestión de residuos sólidos urbanos, limpeza viaria e de praias e xestión do punto limpo. O BNG mostrouse moi crítico con esta medida e lembrou que o goberno local leva tres anos anunciando un estudo de custos para valorar a viabilidade da xestión pública do servizo, mais ate o momento non presentou ningún informe sobre esta cuestión.
O portavoz municipal do BNG, Mario Pillado, lembrou que “a remunicipalización dos servizos de limpeza, auga e lixo foi unha das principais promesas eleitorais do PSOE e a día de hoxe, tras case 3 anos de lexislatura, non foron quen de recuperar a xestión de ningún destes servizos”. “O Sr Llano xa tivo varias oportunidades para mudar o modelo, ao finalizaren os respectivos contratos coas empresas concesionarias da limpeza de instalacións municipais e recollida de lixo, mais lonxe de recuperar servizos, o PSOE consolida a xestión privada, desta volta coa prórroga do contrato da recollida do lixo que ven de aprobar no pleno de hoxe”, sinalou Pillado.

O gasto pola recollida de lixo incrementouse en 93.000€ o pasado ano.
O custo polo servizo de recollida de lixo e limpeza viaria encareceuse uns 93.000€ en 2017, segundo se desprende da liquidación económica do Concello de Burela, o que constitúe un incremento dun 10% do orzamento destinado a este servizo. Neste sentido, xa se manifestara o BNG, no pleno municipal sobre os orzamentos para o presente exercicio, cuestionando o encarecemento dos servizos, así como a falta de vontade política para conseguir mellores servizos e mellor xestionados para Burela.
Mais alá de valorar o funcionamento e o control feito á nova empresa concesionaria, o certo é que o servizo se encareceu e a veciñanza está a pagar máis polo mesmo servizo, algo que se reflicte nas taxas pola recollida do lixo. “Os veciños e veciñas de Burela temos que soportar unhas taxas municipais pola prestación dos servizos básicos das máis caras da comarca, ante a inoperancia e pasividade do Sr. Llano e do seu equipo de goberno”, lamentou Pillado.