A Consellería do Mar destina preto dun millón de euros ás melloras nos peiraos comerciais da Mariña no que vai de lexislatura

Santiago, 1 de abril de 2018.- A Consellería do Mar, a través de Portos de Galicia, destina preto dun millón de euros ás obras de mellora focalizadas nos peiraos comerciais de titularidade autonómica da comarca da Mariña no que vai de lexislatura. Así o contempla o informe do ente público sobre investimentos dende 2016.

Por zonas administrativas, a Zona Norte -costa cantábrica- foi a que recibiu maiores investimentos, cunha achega global de preto dun millón de euros, dada a relevancia dos seus peiraos comerciais. Deste importe, 350.000 euros destináronse a reparacións e obras menores, como as pavimentacións de Ribadeo, a dotación de defensas en Cariño ou as melloras eléctricas en Burela. Ademais, destináronse 240.000 euros á primeira fase da mellora de defensas e medios de amarre en Celeiro-Viveiro e están comprometidos 400.000 para a segunda fase desta mesma obra no exercicio actual.

Este informe recolle que os oito portos comerciais dependentes da Xunta de Galicia –Ribadeo, Burela, Celeiro-Viveiro, Cariño, Laxe, Brens-Cee, Ribeira e Pobra do Caramiñal- posúen unha relevancia fundamental no sistema portuario autonómico dado o volume de tráfico de mercadorías que se manexa neles. Así mesmo, polo seu carácter comercial, están suxeitos a unha normativa de seguridade específica de carácter internacional, o código PBIP.

Por ambos motivos, dende Portos de Galicia mantense unha liña de investimento específico para estas dársenas, co dobre obxectivo de captar novos tráficos e consolidar os actuais e manter permanentemente actualizadas as medidas marcadas pola normativa internacional neste sentido.

Esta estratexia de focalización do investimento sobre os portos comerciais está a dar resultados e unha mostra é o incremento permanente dos tráficos de mercadorías que se desenvolven nestas dársenas. Así, dende o peche de 2015 ata o de 2017 rexistrouse un incremento do 6% no volume destes tráficos.