O PP de Ribadeo critica que o Concello non rehabilite unha vivenda da súa propiedade no casco vello que está en ruínas e que supón un perigo

Ribadeo, 24 de abril de 2018. O Partido Popular de Ribadeo critica ao goberno municipal por non actuar para evitar o perigo que supón unha vivenda en ruínas propiedade do Concello que está no casco vello, concretamente na rúa Bispo Veres, despois de que os seus donos renunciaran á súa propiedade. O portavoz, Jesús López Penabad, considera que o equipo de goberno local debería dar exemplo do que está esixindo a particulares para a rehabilitación de inmobles no núcleo urbano.
Jesús López Penabad manifestou: “desde o Partido Popular queremos denunciar outra vez a distinta vara de medir que usa o alcalde para as actuacións que fai no Concello de Ribadeo, porque hai unha vivenda no casco antigo de Ribadeo, preto da Atalaia, que renunciaron os donos á súa propiedade polo estado de ruína no que estaba e que entón pasou a ser do Concello, que a sacou a subasta pero ninguén puxou por ela. Entón agora é propiedade do Concello e ese inmoble segue en ruínas. Parece lóxico que se se fixo coa propiedade que a adecente, xa non digo amañala toda pero o que debe facer o Concello é dar exemplo do que está esixindo aos propietarios particulares que teñen inmobles na mesma situación que este”.
O voceiro do PP ribadense engadiu: “creo que é outro exemplo máis do rodillo que aplica este señor e que para eles non se aplican as mesmas normas. Eu creo que o primeiro que ten que aplicarse as normas é o propio Concello porque entre outras cousas ten que dar exemplo; e iso é o que non se fai neste Concello de Ribadeo, é o que non fai o alcalde, Fernando Suárez, e o seu equipo de goberno”.