Mondoñedo, 14 de maio de 2018.- O Concello de Mondoñedo implícase na iniciativa para a dotación de audioguías teatralizadas que poñen en valor os recursos turísticos de varias localidades da Mariña, entre elas, a de Mondoñedo.
En concreto, o Concello de Mondoñedo afrontará os curtos dos auriculares e dos aparellos reprodutores (mp3), que permitirán dispoñer da audioguía a través da que se describe o “enorme” potencial turístico e histórico da cidade de Álvaro Cunqueiro, empregando como principal fío condutor a figura do escritor.
A alcaldesa de Mondoñedo, Elena Candia, participou esta mañá no acto de presentación desta iniciativa turística coa que está a colaborar o Concello da cidade episcopal coa finalidade “de potenciar unha proposta de interese para unha localidade cuns recursos turísticos atractivos en varios eidos, tanto no histórico, como no cultural, no literario e no artístico ao que se lle suma o rico potencial de natureza que presenta todo o municipio”.
Elena Candia defendeu a importancia e a necesidade de que estas audioguías sexan traducidas a máis idiomas para que o efecto e as persoas ás que chegue sexa moito maior. Así, defendeu que o Concello aposta e colabora con “calquera tipo de iniciativa que dea a coñecer, describa e explique os nosos recursos; sendo moi necesario e imprescindible para desenvolver esta iniciativas as ferramentas técnicas que sufragará o Concello e que permitirán a reprodución destas audioguías do casco histórico de Mondoñedo”.
Por último, a rexedora puxo en valor este investimento que asumirá o Concello xa que se permitirá, deste xeito, a adquisición de auriculares e mp3 que permitirán incluír nun futuro máis rutas.