O PP de Ribadeo recomenda aos veciños que se informen no Concello porque algúns están a recibir cartas con recargos por intereses de demora dos atrasos do IBI

Ribadeo, 7 de maio de 2018. O Partido Popular no Concello de Ribadeo avisa aos veciños que algúns están a recibir cartas certificadas para comunicarlles o recargo polos intereses de demora dos atrasos do Imposto de Bens Inmobles (IBI). O portavoz do PP, Jesús López Penabad, manifesta que parece que o goberno municipal pretende ocultar todo isto para recadar máis diñeiro dos veciños, aos que lles recomenda que pasen polo Concello a informarse.
López Penabad di: “desde o Partido Popular queremos avisar e poñer en coñecemento de todos os veciños de Ribadeo que a algúns estanlles chegando nas últimas semanas cartas certificadas referidas ao IBI, pero agora xa veñen con recargo, con intereses de demora. Polo tanto recomendámoslles aos levan tempo sen recibir información sobre o Catrasto que se pasen polo Concello para informarse, porque os intereses por este asunto están correndo e cada vez é máis”.
O voceiro do PP ribadense engade que “desde o equipo de goberno non sei se pretenden ocultar todo isto porque ao final acaban nas arcas municipais os cobros do IBI, pero como é algo inevitable e temos que pagar todos os ribadenses queremos que os veciños teñan o maior coñecemento e pagar o mínimo posible. Xa chega con pagar as subas que vai haber, porque teremos un incremento do 8 por centro este ano, sen ter que abonar ademais o de atrás con recargo”.
Polo tanto Jesús López Penabad quere “darlle a máxima difusión a este asunto para que os veciños pasen polo Concello para informarse de se teñen algún recibo do IBI pendente ou non”.