Foz, 19 de xullo de 2018. O Concello de Foz está a piques de rematar a obra de impermeabilización da fachada do centro social focense, que tiña grandes problemas de humidades. Esta actuación conta cun investimento de máis de 26.000 euros.
O alcalde, Javier Jorge Castiñeira, anunciou hoxe que “durante estas últimas semanas estivéronse facendo traballos de impermeabilización do centro social de Foz, que está na praza Conde de Fontao. Alí alberga os Servizos Sociais do noso Concello máis outras organizacións e asociacións, como poden ser a asociación de discapacitados Virxe do Carme, as amas de casa, a asociación de viúvas e a asociación contra o cancro; e ademais é onde fan multitude de ensaios grupos de música do noso concello”.
O rexedor lembra que “había unhas queixas moi grandes polas humidades en zonas que afectaban ao interior deses locais polas filtracións que tiña esta fachada. E o pasado ano 2017, para o uso do remanente e dentro dos acordos dos orzamentos, todos os partidos da corporación adoptamos a decisión de poñer unha partida para a reparación desta fachada do centro social”.
O alcalde salienta que “xa se fixo gran parte desa reparación, seláronse as xuntas de pedra e todas as ventás. Fixo un efecto moi positivo, notouse xa o cambio no interior e xa non hai esas filtracións. Unicamente queda o remate do hidrofugado da pedra cun verniz especial, pero estase esperando a que pasen estes días de humidade para evitar que queden coloracións diferentes na fachada”.
Javier Castiñeira rematou comentando: “estamos contentos. Son máis de 26.000 euros o investimento desta obra que se lle adxudicou á empresa Construcciones Naray e que están a punto de ser rematada. Non deixa de ser un compromiso máis cumprido por este equipo de goberno, que ía dentro das peticións dos grupos municipais nas negociacións dos orzamentos do ano pasado. É unha obra positiva para os Servizos Sociais do noso Concello e para moitas asociacións e organizacións que teñen aí a súa sede”.
O Concello de Foz remata a obra para impermeabilizar a fachada do centro social. O investimento supera os 26.000 euros
Relacionado
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
Estiveron acompañados polas dúas técnicas de Xuventude, para gozar dunha mañá nas distintas actividades que ofrece este parque de trampolíns. Pola tarde, o grupo parou a xantar no Lago das Pontes, onde puido coñecer a historia da súa creación e desfrutar dun baño. A viaxe estivo organizada polas Concellerías de Xuventude e Deporte e pola Oficina de Información Xuvenil dentro do programa “Verán a Tope en Xove 2026”.
Evaristo Calvo, Rebeca Montero e Vítor Mosqueira interpretaron o pasaxe que recrea os últimos momentos do Mariscal Pardo de Cela e da súa muller, Isabel de Castro, antes da traizón da Frouseira. A acción cultural, coordinada por Carme Varela e promovida pola Vicepresidencia da Deputación de Lugo, rende homenaxe ao gran dramaturgo do Valadouro no seu primeiro cabodano. 
