A Casa da Cultura de Burela acolle este venres, a partir das 20:30 horas, a ópera Madame Butterfly, de Puccini

Burela, 1 de novembro de 2018. A Casa da Cultura de Burela acollerá mañá, venres, a partir das 20:30 horas a ópera Madame Butterfly, de Puccini. Xan Carballal, director da Escola de Música de Burela, considera un luxo para A Mariña ter un espectáculo destas características tan preto. E descríbea como unha das últimas xoias do bel canto. 
Carballal lembrou que “xa é a terceira vez que gozamos dun espectáculo así en Burela e nesta ocasión farémolo cunha ópera de Puccini. É un luxo que na Mariña podamos gozar dunha ópera, que, como se soe dicir, é o espectáculo total, onde se combinan todas as artes escénicas. Esta ópera, Madame Butterfly, que é unha das máis emblemáticas de Puccini e dado tamén o exotismo do argumento, que nos traslada ao Xapón do século XIX, é unha ópera para gozar. Ten unhas das páxinas máis fermosas xa non só da historia da ópera senón da historia da música”.
O director da Escola Música de Burela dixo que “os que acudan mañá a Burela van poder ver e gozar a que é considerada como unha das últimas xoias do bel canto. É unha obra que, paradoxalmente, no seu estreo só constaba de dous actos e foi un rotundo fracaso, o que deixou moi afectado a Puccini. Non se esperaba isto e cando xa era un compositor operístico refutado e supúxolle un mazazo grande. Pero é normal ao poñer tanto talento e tanta preocupación, porque Puccini investigou a música xaponesa, a tradición oriental, a arquitectura, arte, cultura e conseguiu un traballo para unha posta en escena emblemática. E atopouse con ese fracaso rotundo de público, que incluso asubiaba; e ao mellor os espectadores igual tiñan a súa razón, dado que o segundo acto era bastante longo e non chegou ao público, ao que xa o primeiro acto deixara un pouco frío”. E seguiu a relatar: “pero o que fixo Puccini foi remodelar un pouco todo e a partir de aí fixo tres actos e cambiou varias cousas da orquestración; e a que vamos escoitar mañá é preciosa, darémonos conta de que acto está acompañado puntualmente pola orquestra. Como lles digo moitas veces aos meus alumnos, o labor de composición ten bastante que ver coa gastronomía, que diría Rossini tamén, porque todo hai que configuralo e mesturalo na súa debida proporción”.
Para Xan Carballal “imos ver unha obra mestra onde iso está levado ao límite. E poderemos observar como dunha forma maxistral acomete melodías que están sacadas da tradición xaponesa e como as mestura coa música máis occidental, porque unha das cousas que se ve na obra é ese choque de culturas, entre a oriental e a occidental. E á xente pídolle que se meta ou pouco no papel porque vai gozar como nunca. Téñoo moi claro”.
A venda de entradas en taquilla o venres, para asistir será de 18:30 a 20:00 horas.