O BNG solicita a retirada dos retratos de presidentes franquistas da Deputación de Lugo

Lugo, 29 de outubro de 2018. O voceiro do BNG na Deputación de Lugo, Xosé Ferreiro, anunciou a presentación dunha petición formal para que se proceda á retirada dos retratos de presidentes franquistas desta insitución. Ferreiro lembrou que “está neste momento en vigor a chamada Lei de Memoria Histórica de obrigado cumprimento para todas as administracións” e explicou “aínda coas evidentes eivas democráticas que claramente teñen as deputacións, tanto na súa formación como no seu funcionamento, estas tamén están obrigadas ao seu cumprimento”.

Nos corredores da planta baixa da Deputación de Lugo están habitualmente colgados os retratos dos presidentes da Deputación. Neste momento os cadros foron retirados para a súa recolocación unha vez estén feitos os das dúas últimas persoas que ostentaron a presidencia da institución nos últimos anos. Xosé Ferreiro sinalou que “este é o momento de facelo, unha vez que foron retirados dos corredores da Deputación, e así cumprir a Lei de Memoría Histórica que impulsara o propio PSOE”.

Ferreiro incidiu en que “grazas ao traballo do BNG fóronse eliminando os símbolos franquistas na cidade e tamén se mudaron os nomes dos rueiros que incumprían a Lei de Memoria Histórica” e engadiu “por eso seguimos traballando e avanzando na eliminación de vestixios da ditadura”. “As accións en relación á memoría histórica non van dirixidas ao pasado se non ao futuro, agora que vemos un avance da ultradereita” dixo Ferreiro