A subdelegada do Goberno apela á prudencia dos condutores no Día Mundial en Lembranza das Vítimas de Accidentes de Tráfico

Lugo, 19 de novembro de 2018.- A subdelegada do Goberno, Isabel Rodríguez, presidiu hoxe o acto conmemorativo do Día Mundial en Lembranza das Vítimas de Accidentes de Tráfico. No acto, que se celebrou diante da Xefatura provincial de Tráfico, Isabel Rodríguez deu lectura a un manifesto tralo que se gardou un minuto de silencio para recordar ás persoas que perderon a vida ou resultaron feridas en sinistros de circulación. Xunto coa subdelegada do Goberno participaron na conmemoración o Xefe provincial de Tráfico, Ángel Álvarez; a Concelleira de Benestar, Ana González Abelleira; o Deputado provincial de Relacións Institucionais, Álvaro Santos, e o Xefe territorial de Presidencia, Ramón Carballo, así como persoal da DXT e representantes de distintas asociacións e colectivos sociais.

A subdelegada do Goberno lembrou ás vítimas do tráfico e aos seus familiares e aproveitou para facer un chamamento a todos os condutores para que respecten as normas de circulación e eviten comportamentos como o uso de teléfonos móbiles ao volante ou viaxar sen o cinto de seguridade. Segundo os datos da DXT, en máis da metade dos accidentes mortais producidos en vías interurbanas da nosa provincia, o 52,6%, concurre a conducción distraída ou desatenta como un dos factores. Tocante ao uso do cinto, en Galicia case a cuarta parte dos falecidos no que vai de ano non levaban posto este elemento de seguridade.

Este ano, ata o 17 de novembro, rexistráronse na provincia 2.740 accidentes, nos que perderon a vida 22 persoas, 79 resultaron feridas graves e 606 leves.

O manifesto conmemorativo do Día Mundial en Lembranza das Vítimas de Accidentes de Tráfico destaca que “as mortes e feridas por accidente de tráfico son acontecementos súbitos, violentos e traumáticos, con impacto de longa duración, a miúdo permanente. Cada ano, millóns de novos feridos e familiares afectados de cada rincón do mundo engádense aos incontables millóns que xa sofren como resultado dun accidente de tráfico.

A inmensa dor e a angustia experimentada por gran número de persoas é maior porque moitas das vítimas son xóvenes, porque moitos dos accidentes puideron e deberon evitarse e porque a resposta ante os mortos e feridos na estrada e cara as vítimas e os seus familiares é a miúdo inadecuada, incomprendida e inapropiada en relación á perda dunha vida ou da calidade de vida.

O día en lembranza das vítimas de accidentes de tráfico tenta responder á necesidade de recoñecemento público da perda e o sufrimento que teñen as vítimas de accidentes de tráfico.

Este día é tamén unha ferramenta importante para os gobernos e todos aqueles que traballan para a prevención ou no post-accidente, xa que dá oportunidade de demostrar a enorme escala e impacto de mortes e feridos nas vías públicas e a necesidade urxente de accións eficaces.

A resposta dos gobernos de todo o mundo ao chamamento da ONU para o recoñecemento oficial do día Mundial en Lembranza das Vítimas de Accidentes de Tráfico amosa a seriedade coa que tratan o complexo tema do risco nas vías públicas e a reducción de accidentes de tráfico. E o seu compromiso á causa é seguido de preto polas vítimas de accidentes de tráfico e ONG de Prevención de Accidentes de Tráfico afíns.

Este ano 2018 o lema oficial é ´´as rúas e estradas contan historias“, ogallá consigamos entre todos que todas as estradas conten historias felices”.