Alumnado de 5º de primaria do CEIP Virxe do Carme realizaron a ruta Burela Histórica. Fixérona acompañados polas monitoras de Gaia e coñeceron unha fonte e o seu lavadoiro, hórreos, un castiñeiro centenario e a Igrexa da Vila do Medio

Burela, 16 de febreiro de 2019. As monitoras do Centro Gaia, pertencentes á Concellería de Medio Ambiente de Burela, acompañaron ao alumnado de 5 º de Primaria do CEIP Virxe do Carme nunha ruta titulada Burela histórica, para coñecer e visitar algúns dos elementos do patrimonio natural, cultural e histórico do concello como a fonte da Lamela, xunto co seu lavadoiro, o castiñeiro centenario, a igrexa da Vila do Medio e un par de hórreos desta mesma zona.
Segundo explican as propias monitoras de Gaia “os obxectivos desta saída foron que os rapaces coñeceran as nosas raíces, cómo se vivía en Burela antigamente, que Burela nos séculos XVI e XVIII destacaba pola pesca da balea franca e como esta actividade supuxo un enorme recurso económico. Coa visita ao lavadoiro os rapaces aprenderon costumes xa esquecidos na nosa época. E grazas á visita á igrexa da Vila do Medio coñeceron a arquitectura e as pinturas que ten este templo, que é do século XV, aínda que tivo unha ampliación no XVIII”.
Gaia considera “de enorme importancia facer este tipo de saídas polo pobo, que nos ofrecen a oportunidade de coñecer mellor o noso e aprender a respectalo e valoralo como se merece”.