Soto: “a demagoxia gratuíta que emprega o PSOE para atacar ao goberno de Cervo está fóra de lugar e é absolutamente reprobable”

Cervo, 26 de febreiro de 2019.- O edil de Seguridade Cidadá, José Ramón Soto, lamentou “a demagoxia gratuíta que emprega o PSOE co único obxectivo de atacar ao Goberno de Cervo, baseada en argumentos que están totalmente fóra de lugar e que son absolutamente reprobables”.
Soto fixo estas declaracións a raíz dun comunicado emitido polos socialistas cervenses sobre as obras de mellora e acondicionamento que se están a levar a cabo estes días en varias rúas do núcleo de Cervo.
O concelleiro precisou “que este Concello non entende de improvisación, é neste caso, loxicamente, e seguindo o noso procedemento habitual, antes de iniciar esta actuación xa establecemos un protocolo de actuación en caso de urxencia avalado polos servizos municipais técnicos e de emerxencias, no que contemplamos e estudamos todas as eventualidades que puidesen xurdir”.
Soto recoñece “que a execución de calquera obra deste calado ocasiona incomodidades á veciñanza”, pero precisa que “se trata dunha situación temporal e transitoria”; e acláralle aos socialistas “que nos cascos urbanos de moitas vilas – como podería ser Viveiro por exemplo- os medios de emerxencia teñen que enfrontarse a situacións moi complexas, e adaptarse ás circunstancias coas que se atopen, dada a imposibilidade de acceder cos vehículos a moitas das vivendas e as deficiencias de accesibilidade que existen en moitas edificacións”.