O BNG de Viveiro aposta polo deporte para todas e todos no concello

 Viveiro 19-5-19. Xunto con Miriam Bermúdez, da conta de todo isto Santi Chao, número 9 na candidatura do BNG de Viveiro onde comentan que dende o BNG concebimos que a práctica da actividade física e do deporte é benestar para as persoas, polo que cremos que o deporte debe estar dirixido a todas e todos independentemente da idade, xenero, discapacidades físicas, psíquicas ou sensoriais. Partindo da premisa anterior, as liñas de acción política do BNG no concello de Viveiro no ámbito do deporte estarán orientadas a:

Garantir a posibilidade de acceso á actividade físico-deportiva para todos os cidadáns e cidadás que o demandaren, e coa adecuada supervisión técnica.
Realizar un traballo de coordinación e promoción do tecido asociativo deportivo.
Prestar unha especial atención ao deporte escolar e de base, a través da optimización das infraestruturas existentes.
Considerar o deporte de competición no sentido amplo e non só dos deportes masivos e entendelo como un estímulo e complemento da práctica da actividade físico-deportiva.
Impulsar a creación de escolas deportivas, así como a ampliación e diversificación da oferta existente de actividade físico-deportiva para todas as idades.
Dar pulo ás actividades fisico-deportivas populares e masivas ao aire libre, a través da elaboración de proxectos deportivos para toda a poboación e da utilización da vila como espazo onde a práctica do deporte poida ser un feito cotiá a través de roteiros deportivos urbanos e rurais.
Pular por dar visibilidade aos deportes “minoritarios”, poñéndoos en valor e chamando a atención sobre as súas potencialidades.

Estas liñas de acción política a desenvolver polo BNG desde o goberno municipal concretaranse nas seguintes actuacións:

Actuacións en infraestruturas deportivas
● Realización dun censo das instalacións deportivas públicas, municipais e comarcais, para optimizar o seu uso, promovendo cando sexa posible a optimización das instalacións a nivel mancomunado entre diferentes concellos.
● Habilitar para a práctica deportiva espazos naturais, rurais e urbanos, respectuosos co medio ambiente, no que atinxe a aquelas actividades integradas no medio (tales como o Parque de Covas…)
● Impulsar a optimización das infraestruturas dos centros educativos de Viveiro para a súa utilización fóra do horario lectivo, en colaboración coa administración educativa e co tecido asociativo deportivo.
● Prestar especial atención ás necesidades de acceso e uso sen barreiras nas instalacións deportivas (criterios de accesibilidade).
● Realizar un Plan de xestión para o uso da piscina municipal, pavillón polideportivo, campos de fútbol e outras instalacións deportivas de titularidade municipal

Deporte escolar
O Bng considera a escola como primeiro núcleo, básico, para achegar os nenos e as nenas á actividade físico-deportiva. Así que é necesario introducir á infancia no deporte como xogo e un xeito de relación social, non como pura competición. Con tal finalidade cremos necesario desenvolver:
● Campañas extraescolar de animación ao deporte nas escolas.
● Xornadas de práctica deportiva extraescolar para tomar contacto cos distintos deportes.
● Fomento da participación dos centros de ensino nas distintas modalidades deportivas.

Deporte de base
● Na política de axudas primarase o modelo educativo-deportivo (diversificación deportiva, normalización lingüística, superación da discriminación de sexo) e o traballo máis que os resultados.
● Facilitar a utilización das instalacións deportivas municipais e o asesoramento necesario para a formación de monitores/as, persoal directivo, árbitros/as.
● Potenciar asociacións de clubes de base de ámbito municipal.

Deporte federado
● Solicitar ás administracións supramunicipais, en colaboración directa coas respectivas federacións, a adecuada dotación e mantemento das infraestruturas deportivas de propiedade municipal (campo de fútbol de Cantarrana…) utilizadas polo deporte federado non de elite.
● Estabelecer convenios de colaboración cos clubes federados orientados á dinamización social e á súa implicación na política deportiva municipal.
● Asinar, no seu caso, cos clubes de elite, convenios para a promoción do deporte entre a poboación escolar, por medio de visitas a centros educativos, charlas, xornadas ou de facilitar o acceso ás competicións deportivas.

Deporte recreativo
● Promover o deporte recreativo, como factor de lecer, para mellorar o estado físico, organizando competicións de carácter popular ou xornadas de deporte na rúa e impulsando campañas de sensibilización sobre os aspectos positivos da práctica do deporte.
● Promover diversas actividades deportivas no medio natural: vela, submarismo, programas de camiñada, circuítos populares e roteiros que axudarán á veciñanza a coñecer os espazos naturais do municipio e a concienciar da necesidade de preservar estas contornas. Asimesmo estas actividades contribuirán a achegar a poboación de Viveiro as súas parroquias, mellorando a súa cohesión social.
● Potenciar o achegamento dos/as cidadáns/as ás instalacións deportivas e aos eventos deportivos cunha política de prezos axeitada.

Deporte dirixido a persoas con diversidade funcional
● Atender as necesidades e demandas, en materia de deporte, de todos e todas as deportistas con discapacidade que precisen da intervención e colaboración da administración para desenvolver a súa vida deportivo competitiva.
● Promover a súa inclusión social e laboral a través da actividade física e do deporte.
● Facilitar o acceso das persoas con diversidade funcional aos recintos deportivos, a través da adaptación dos mesmos para seu uso.

Deporte para persoas maiores
● Achegar a actividade físico deportiva, como servizo público de benestar ás persoas maiores, como por exemplo a través de cursos formativos sobre o uso correcto dos parques biosaudables existentes no concello.
● Promover programas de deporte específicos para maiores.

Eventos deportivos
● Promoción de deportes de carácter autóctono e xogos populares con arraigo no concello (carreiras de cabalos, bolos…)