O PP recorda á alcaldesa de Viveiro que moitas das obras en execución no municipio teñen subvención do 100% da Xunta de Galicia

 Viveiro, 30, outubro, 2019. A alcaldesa de Viveiro, María Loureiro, ten unha acusadísima tendencia a esquecer o que desde moi antigo se sabe: hai que dar ao César o que é do Cesar e a Deus o que é de Deus. Intencionadamente esquece esa norma, que, traducida á nosa cultura, ven ser aquilo de dar a cada un o seu. Pois a alcaldesa Loureiro barre para o seu goberno cando fala da execución de nove obras, con inversión total de 628.667 euros. Dito así, como o contou días atrás nun xornal lucense, parece que é o goberno de Viveiro, con fondos do Concello, o que paga esas obras. E non, non é así, e para que o do César sexa do César, etcétera e dar a cada un o seo, o Grupo Municipal Popular de Viveiro quere aclarar a procedencia dos fondos para as obras das que fala.

Por exemplo, para a recuperación do miradoiro Monte Faro, a Xunta aportou 24.832 euros dos 38.203 euros que custou. Xa imos dando a cada un o seu. Pero neste labor de xustiza, aínda nos queda camiño que andar. Fala a alcaldesa da reposición de pavimentos e servizos na rúa Benito Galcerán, que se fixo con cargo ao convenio coa Deputación. Ve señora Loureiro como é fácil dar a cada un o seu? E Seguimos, porque a Xunta subvencionou o 100% dos 94.687 euros da obra de mellora do firme, saneamento, recollida de pluviais, abastecemento e alumeado no Camiño Vello.

Como facer xustiza sempre é bo, seguimos co detalle de quen e quen á hora de investir en Viveiro. Á Xunta se debe tamén a subvención polo 100% do importe da obra de reforma da instalación eléctrica do campo de fútbol municipal, por importe de 46.240 euros. E seguimos, que isto vai ben para que os veciños saiban como son as cousas dos cartos á hora de facer obras en Viveiro. A renovación de aceras e firme na avenida de Vilalba (32.117 euros) e a ampliación do saneamento de Toxeiras (autorizada por Augas de Galicia) son financiadas con cargo ao Plan Único da Deputación; recorda señora Loureiro que plan é ese e canto lle debe ao PP, incluídos claro, os votos para aprobalo. E con subvención ao 100% a cargo da Xunta, por medio do Agader, (menos o IVE) finánciase a reposición do firme de varios camiños. E outra cousiña, o Plan único da Deputación tamén cubre a maior parte do custo da obra de substitución do pavimento do pavillón municipal.

O grupo popular, que ten por voceiro a Óscar Rodríguez, confía en que, en adiante, a alcaldesa de Viveiro non esqueza dar a cada un o seu, que, en casos como este, quere dicir deixar claro quen paga as obras que se fan no municipio. É unha cuestión de transparencia e honestidade no xogo político. Verá que pouco custa facer as cousas ben!