Ampla representación popular na concentración en Foz en defensa de Alcoa-San Cibrao, á que o Goberno central pon en situación de emerxencia

 Lugo, 4 de decembro de 2019. A presidenta provincial do PP de Lugo, Elena Candia, encabezou esta tarde unha ampla representación popular na concentración desenvolvida en Foz en defensa do futuro de Alcoa-San Cibrao, convocada polo comité de empresa. O PP liderou desde o comezo a reivindicación de medidas que garantan a continuidade dunha industria que é fundamental tanto para a comarca de A Mariña como para o conxunto da provincia, de cuxo PIB representa un 30%. Os populares comparten a consideración do comité de empresa, que pide unha reunión da mesa de seguimento de Alcoa, de que as condicións fixadas polo Goberno central para a poxa de interrompibilidade fan que a situación da empresa pase da urxencia de medidas para garantir o seu futuro a unha situación de verdadeira emerxencia.

Para os populares é inaudito o total desinterese que demostra o Goberno presidido polo socialista Pedro Sánchez con respecto a Alcoa-San Cibrao, que xera uns 2.000 postos de traballo, entre directos e indirectos. O PP leva meses esixindo ao Goberno a aprobación do Estatuto do Consumidor electrointensivo, un marco necesario para estabilizar en niveis asumibles o prezo da enerxía. A situación aínda se volveu máis alarmante á vista das condicións fixadas polo Goberno para a poxa de interrompibilidade, que se efectuará entre os próximos días 16 e 20, na que non haberá bloques de 40MW, os máis importantes para a gran industria; terán que competir por 200 bloques de 5 MW.

O Partido Popular recorda que o principal problema que afecta a factoría de Alcoa en San Cibrao é que non pode competir en igualdade de condicións que o resto da industria europea por mor dun prezo eléctrico excesivamente alto. O Goberno socialista, pese a que se esgota o tempo para intervir, non aplica nin tan sequera as liñas básicas elaboradas pola Xunta de Galicia en consonancia coas demandas dos traballadores e do comité de empresa. Igualmente destaca que a poxa de interrompibilidade máis baixa da historia que acaba de aprobar o Goberno central pon en grave risco o futuro de Alcoa-San Cibrao.