Balseiro destaca que a Escola de Hostalería do IES de Foz “representa a calidade da formación profesional en Galicia”

 Foz, 13 de febreiro de 2020.- O delegado territorial da Xunta en Lugo, José Manuel Balseiro, asistiu hoxe ao campionato de baristas que se celebra no IES de Foz, onde participou na entrega de trofeos e diplomas aos baristas de escolas de Hostalería. O primeiro posto foi para Xoel Carrera, do CIFP Paseo das Pontes; e quedaron finalistas Maialen Delegado, da Escuela de Hostelería de Gamarra (Vitorio), e Perla Daniela Sención, do IES de Foz.

Balseiro felicitou á comunidade educativa do instituto “por seguir mellorando e medrando”, dado que nesta edición inclúen unha nova modalidade nos campionatos. Tamén destacou que esta cita, que atrae a moitos visitantes cada ano a Foz, “supón un valor engadido para o concello e para a Formación Profesional en Galicia, cuxa calidade representa á perfección este centro”.

O certame comezou onte no IES de Foz e o programa de actividades continúa hoxe e mañá. Este ano celébrase o XIII Campionato internacional de baristas de escolas de hostalería, o VIII Campionato internacional de baristas profesionais, o VIII Campionato internacional de cata de cafés de escolas de hostalería e, como novidade, o I Campionato internacional de cata de cafés de profesionais.

O delegado tamén destacou que a cita estrea nesta ocasión un espazo renovado, despois de que a Consellería de Educación, Universidade e Formación Profesional acometera unha reforma completa do salón de actos do IES, cun investimento de 153.000 euros.

As melloras realizadas permitiron incrementar o aforo de 120 a 154 prazas e mellorar a acústica, o illamento, o chan e a pintura, as butacas, o escenario e os equipos de iluminación, son e vídeo, entre outros elementos.