O PP acusa ao PSOE de Foz de preparar o terreo para que Pedro Sánchez non aprobe as alegacións dos traballadores e da Xunta ao estatuto para consumidores electrointensivos

 Foz, a 6 de marzo de 2020. Dende o Partido Popular lamentamos a actitude do alcalde de Foz, o socialista Fran Cajoto, tratando de confundir aos veciños nun tema tan importante como é o de Alcoa. O PP abstívose o xoves, na sesión plenaria da corporación municipal de Foz, nunha moción de urxencia presentada polo PSOE sobre Alcoa. Era unha moción que entendemos que non protexía correctamente a posición que defenden conxuntamente os traballadores e os gobernos autonómicos de Galicia Asturias e Cantabria; máis ben defende unha futura decisión do Goberno socialista de non recoller no Estatuto para Consumidores electrointensivos a totalidade das alegacións presentadas.
Nós, diante desta situación, presentamos unha emenda para que quedase claro que había que aprobar a totalidade das alegacións consensuadas entre os gobernos autonómicos e os traballadores. Esta emenda non foi aceptada e tivemos que absternos, porque consideramos que o acordo que propuxeron os socialistas era máis ben xustificativo da acción do Goberno do Estado que defensora dos intereses de Alcoa.
Con isto, Cajoto trata de desculpar e de enmascarar o erro dos socialistas no Senado, que votaron en contra dunha moción do PP a favor de aprobar todas esas alegacións e trae a Foz a proposta de Pedro Sánchez para que nosoutros a votemos; iso si que nos indigna. A posición do PP de Foz é a mesma do PP de Lugo, que conseguiu que na Deputación se aprobase a súa moción, a pasada semana, para que o Goberno socialista atenda todas as alegacións ao estatuto para consumidores electrointensivos; o PSOE aprobou na Deputación esa moción popular, que tiña o mesmo obxectivo da que días despois rexeitou no Senado.
Pedimos neste caso un pouco de coherencia aos socialistas de Foz e que deixen de terxiversar e lear o asunto de Alcoa e aproben un estatuto que recolla as pretensións de todos os galegos e especialmente dos mariñáns.
Gabinete de Comunicación