Cervo, abril de 2020.- O venres 17 de abril, unha boa noticia chamou á porta da asociación de saúde mental A Mariña en forma de resultado negativo á proba do coronavirus para todas as persoas traballadoras e usuarias da entidade. A proba foi realizada o pasado domingo día 12 grazas ás facilidades ofrecidas pola directora do Hospital da Mariña, María José Cortés, e á axilización do Delegado Territorial da Xunta de Galicia en Lugo, José Manuel Balseiro.
Dende a asociación queren, por tanto, mandar unha mensaxe de tranquilidade, ánimo e esperanza, á vez que recordan que os posibles casos positivos que se poidan dar nestes ou noutros centros, non son sinónimo de mala praxe, senón da dificultade de loitar contra un inimigo invisible tan poderoso. Non deixan de agradecer o esforzo que está a facer tanto o persoal traballador como as persoas usuarias e as familias para favorecer o bo desenvolvemento das actividades da entidade nun contexto tan adverso.
Dende o pasado 11 de marzo, dada a alerta sanitaria existente e aínda antes da declaración do estado de alarma, a asociación A Mariña comezou a extremar as súas precaucións fronte ao COVID-19. Ese día quedaron restrinxidas as visitas á unidade residencial e estremáronse as medidas de protección e hixiene. Ao día seguinte restrinxíronse as saídas do centro, adaptando as súas instalacións para que as persoas internas puidesen dispor de máis servizos e actividades de ocio dentro. Igualmente, estanse a desinfectar as zonas exteriores da unidade residencial diariamente dende o 21 de marzo.
Para celebrar a boa nova de todos os resultados negativos na proba do coronavirus, as persoas usuarias da asociación A Mariña xa comezaron a gozar, o propio venres 17 de abril, das saídas terapéuticas para as que teñen permiso médico.
92 persoas usuarias atendidas no último mes
Durante todo este tempo de adaptación ás novas circunstancias, A Mariña traballou duramente para garantir o mantemento dunha atención axeitada, de calidade e moi necesaria ás persoas con problemas de saúde mental. Dende o 11 de marzo estase a atender a 92 usuarios, realizando actuacións nos seguintes eidos: 2.326 casos de supervisión da medicación; 2.542 actuacións de atención sanitaria; 1.466 actuacións de supervisión personalizada de cada usuario ou usuaria; 2.682 intervencións sociais e de ocio; 326 intervencións psicolóxicas; 18 casos de apoio económico prestado pola asociación e, o que é máis importante, cero casos de ingresos en agudos.
Palabras de sentido agradecemento
A directora da asociación A Mariña, María José Novoa, non deixa de dedicar palabras de agradecemento a todas as persoas, entidades e axentes que están a facilitar a adaptación da asociación a un contexto tan complexo. En primeiro lugar, agradece a labor do persoal técnico da asociación polo seu esforzo e compromiso, ás familias pola confianza e pola calma, e ás persoas usuarias polo seu comportamento e adaptación exemplar á nova circunstancia.
Manda palabras de agradecemento ao persoal sanitario que se achegou a facer as probas do COVID-19 pola súa boa disposición e trato; á directora do Hospital da Mariña, María José Cortés, por facilitar a proba a todas as persoas traballadoras e usuarias de todos os recursos da asociación; ao Concello de Cervo, especialmente á concelleira de Servizos Sociais, Pilar Armada, por facilitar a desinfección diaria da residencia; ao GES (Grupo de Emerxencias Supramunicipais), con Mario Antuña, que acude a realizar dita desinfección; a Nati, de Decoraciones Ajuar, pola doazón das primeiras mascarillas de tela das que dispuxo a asociación; ao Cluster da Saúde, con Gisela como xerente, polo envío do primeiro material de protección completo que recibiu a asociación (batas gafas, mascarillas, calzas); a Makers da Mariña, especialmente a David, polo envío de pantallas de protección; a Saúde Mental FEAFES Galicia polo apoio constante en todo momento; á Dirección Xeral de Asistencia Sanitaria, especialmente a María Tajes, pola súa preocupación; ao Dr. Vila, coordinador de área; á Unidade de Saúde Mental de Burela, especialmente á psiquiatra Berta López, por facilitar os permisos para as saídas terapéuticas ás persoas usuarias da residencia e dos pisos; a Susana López Abella, Secretaria Xeral de Igualdade, pola súa preocupación polas usuarias dos pisos para mulleres vítimas de violencia de xénero e a entidade en xeral ; e ao Delegado Territorial da Xunta de Galicia en Lugo, Jose Manuel Balseiro, pola axilización das provas do COVID-19.
A Asociación de Axuda ó Enfermo Mental A Mariña foi fundada en 1999 por familias afectadas por problemas de saúde mental que uniron os seus esforzos para loitar por un obxectivo común: lograr que aos enfermos mentais e ás súas familias se lles preste unha axuda e asistencia continuada, buscando a súa integración na sociedade e traballando, para iso, na súa rehabilitación. Actualmente conta con Centros de Rehabilitación Psicosocial e Laboral en Burela e en Ribadeo, unha vivenda tutelada en Burela, a Unidade Residencial de Cervo e pisos para mulleres con enfermidade mental vítimas de violencia de xénero. Forma parte, xunto a outras 14 asociacións galegas, da federación Saúde Mental FEAFES Galicia.
A variada oferta de produtos de artesanía e de alimentación de temporada e proximidade á venda complementouse con degustacións de minihamburguesas de carne de raza Limiá e empanada de carne de porco celta e tenreira de raza Caldelá, que se repartiron gratuitamente entre as peroas que fixeron algunha compra no Mercadiño.
Os cortes produciranse do punto quilométrico 2,800 ao final da vía. Habilitaranse desvíos alternativos que estarán debidamente sinalizados.
Cada participante pode presentar unha única fotografía, en papel e formato dixital, seguindo as bases dispoñibles na web da Deputación. A celebración do aniversario inclúe actividades como a Xornada de Degustación da Tenreira de Ancares, unha xornada micolóxica e un obradoiro de rescate na montaña, ademais doutras propostas ambientais e divulgativas nos próximos meses.
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
