Lugo, 8 de maio de 2020. O Presidente da Deputación de Lugo, José Tomé Roca, convocou un comité de seguimento dos catro centros de maiores de titularidade provincial co fin de abordar e avaliar a súa xestión ante a crise sanitaria da Covid-19. Na reunión de traballo, celebrada na Sala de Xuntas do Pazo de San Marcos, participaron ademais do Presidente, o Deputado de Promoción Económica e Social, Pablo Rivera, e as directoras dos catro centros, situados en Trabada, Pol, A Fonsagrada e Ribadeo.
“É moi importante manter estas reunións para analizar as particularidades e situacións que se están dando en cada un dos centros”, explica o Presidente. “Tanto as directoras dos centros, como todo o persoal, un total de 90 traballadores e traballadoras, están facendo un labor excepcional, con moita dedicación e compromiso, e reafirmámolo neste comité, no que lles trasladei que é unha boa nova que os resultados dos test realizados a traballadores e usuarios fose negativo, pero que isto non nos pode permitir baixar a garda e debemos continuar sendo rigorosos como ata o momento”, asegura Tomé.
Nestes bos resultados, o Presidente destacou que foi clave a anticipación coa que se actuou, ao implantarse rigorosas medidas de prevención antes da declaración do estado de alarma e mesmo por riba dos protocolos establecidos polas autoridades sanitarias.
A reunión serviu para analizar os diferentes protocolos e pasos que se foron dando nas residencias dende que a Organización Mundial da Saúde (OMS) declarara a enfermidade como unha pandemia a nivel mundial. “Dende ese momento teñen implantado un protocolo específico de medidas contra a Covid-19 elaborado por persoal técnico da área de Promoción Económica e Social, que se foi actualizando para ir en concordancia coa normativa, instrucións, protocolos ou guías publicadas polas autoridades competentes”, subliña o Presidente. Entre esas medidas, atópanse vixentes dende entón a prohibición de visitas de amigos e familiares, o reforzo do servizo de limpeza, e os traballos de desinfección preventiva realizados en todos os centros, tanto no interior, como no exterior.
Anticipación
As directoras dos centros destacaron a importancia de que a institución provincial implantara medidas antes do estado de alarma, facilitándolles tempo para adiantarse e reconfigurar a organización dos centros para actuar con seguridade sanitaria nestes lugares nos que conviven persoas cun nivel alto de vulnerabilidade ante a Covid-19. Así mesmo, puxeron de manifesto que na primeira semana de marzo desenvolveron obradoiros cos usuarios e cos traballadores do centro para familiarizarse con prácticas de hixiene exhaustivas como o lavado de mans, colocación de EPIs e, entre outras medidas, establecer unha nova maneira de relacionarse entre eles.
Catro entregas de material da Deputación
As residencias provinciais recibiron catro envíos de material de protección -e na próxima semana realizarase un quinto-, que a Deputación de Lugo lles fixo chegar durante o estado de alarma. Materiais e EPIs que complementan aos que xa se entregaron con anterioridade, antes do estado de alarma, tal e como establecían os protocolos que implantou a institución provincial.
As directoras das residencias concordaron ao manifestar que sentiron e continúan sentindo un gran apoio moral e asesoramento por parte do persoal da área de Benestar da Deputación e dos responsables políticos. Expuxeron que, ata o momento, sempre dispuxeron de material suficiente para dar unha correcta e segura atención aos maiores, grazas en boa medida á constante e directa comunicación reforzada durante esta situación excepcional.
Desescalada
Outro dos puntos abordados no comité de seguimento foi o proceso de desescalada nos centros de atención a maiores. Actualmente, malia que o resto da poboación pode saír a pasear ou a facer deporte seguindo franxas horarias, os usuarios e usuarias das residencias seguen en confinamento total e prevese que sexan dos últimos colectivos en poder saír e recibir visitas de familiares e amigos dada a súa gran vulnerabilidade.
O Presidente explica que se están elaborando protocolos para cando se retomen as visitas de familiares e os usuarios poidan saír a pasear.
Xestión pública de centros de proximidade
O Presidente subliñou que a crise da Covid-19 demostra que o modelo asistencial público e de proximidade polo que aposta a Deputación achega “un plus de calidade na atención aos usuarios e de tranquilidade para as familias, xa que son centros pequenos nos que se garante que os maiores reciben os coidados e servizos que precisan e aos que teñen dereito, preto do seu lugar habitual de residencia”.
Precisamente, durante o estado de alarma a Deputación ofreceulle á Xunta de Galicia, a través dunha carta dirixida á Conselleira de Política Social, a máxima colaboración para que cinco persoas maiores veciñas da Fonsagrada que eran usuarias das vivendas comunitarias privadas que foron intervidas e pechadas pola Administración autonómica ingresasen no centro público que a institución provincial ten nesta localidade. A día de hoxe, a Deputación non recibiu resposta da Consellería.
As estudantes recibiron o galardón “Pizza Chef Emergente”, un recoñecemento que destaca o talento das novas promesas da gastronomía e que supón un importante logro para o centro educativo e para a formación profesional da comarca.
O percorrido comeza nun lugar simbólico: as pontes sobre o río Sor, que unen as provincias da Coruña e Lugo e marcan un dos vértices do territorio lucense. Con esta iniciativa, Guido Guía propón unha travesía pola diversidade paisaxística, histórica e humana da provincia, destacando a riqueza dos seus espazos naturais, monumentos e comunidades.
O delegado subliñou o importante papel que realiza o tecido social para conseguir melloras en beneficio da veciñanza e dinamizar social e culturalmente a localidade. Neste sentido, lembrou que a Xunta impulsa o movemento asociativo a través de apoios para o acondicionamento dos seus locais ou para o desenvolvemento de actividades.
A cita será o luns 19 de outubro, ás 17:30 horas, cun punto de encontro no peirao de San Cibrao. Ademais, os diferentes edificios municipais iluminaranse de cor rosa para sensibilizar á poboación sobre a importancia da detección precoz, fundamental para mellorar o prognóstico e a supervivencia das pacientes que padecen esta enfermidade.
O domingo 20 de decembro a Praza César Chavarría acollerá de 11:00 a 20:00 horas unha nova edición do Mercadiño de Nadal organizado polo Concello de Lourenzá, “unha cita para desfrutar do ambiente destas datas e compartir unha xornada especial na nosa vila”, anuncia a alcaldesa, Rocío López. O prazo de inscrición para instalar cun posto xa está aberto e a participación é totalmente gratuíta. As solicitudes poden facerse ata o 16 de decembro nas oficinas do Concello de Lourenzá ou a través do teléfono 982.121.006.
Durante 45 minutos, tres malabaristas —Pablo Reboleiro, Aitor Garuz e Santiago Montero— mergúllanse nun caos divertido onde ninguén manda e todo flúe entre xogos de poder, equilibrios imposibles e humor. A obra amosa como, no mundo dos malabares, romper os patróns establecidos pode levar a descubrir que a verdadeira maxia está en aprender a xogar xuntos.
No encontro, abordáronse temas como a posibilidade de colaborar na mellora da formación dos traballadores, destacando a importancia que ten ese aspecto neste sector estratéxico para Galicia. Tamén se trocaron puntos de vista relativos ás condicións laborais dos profesionais do mar.
