O Presidente felicita aos usuarios, traballadores e familias da residencia de Ribadeo polo primeiro aniversario do centro

 Lugo, 14 de xuño de 2020. O Presidente da Deputación de Lugo, José Tomé Roca, felicitou aos usuarios e usuarias, traballadores e familias do Centro de Atención a Maiores que a institución ten en Ribadeo polo primeiro aniversario da apertura da residencia.

José Tomé fíxolles chegar un vídeo no que lles manda mensaxes de alento e os felicita por este ano que acaban de cumprir. “Aínda que a situación provocada pola pandemia xa mellorou, as circunstancias seguen sen ser as que desexaríamos para pasar este día de festa. Hoxe gustaríame estar aí con vós, ao voso lado, falando e conversando xuntos como fixemos xa nalgunha ocasión antes de que chegara a crise do coronavirus. Xa queda menos para volver á normalidade e seguro que pronto poderemos volver a estar xuntos. Vós vivistes momentos difíciles nas vosas vidas e estou convencido de que pronto superaremos tamén esta dura etapa que nos está tocando vivir agora”.

O Presidente deulles ademais a noraboa tanto aos residentes como ao persoal polo resultado negativo das probas de detección da Covid-19. “Hoxe é un día importante no que podemos estar contentos polo primeiro aniversario do centro, pero tamén porque o resultado das probas do coronavirus deron negativas. É o gran resultado dun esforzo conxunto, voso e das persoas que vos coidan. Isto non nos pode permitir baixar a garda, pero si nos permite coller máis forza para seguir sendo disciplinados e cumprindo cos protocolos como ata o de agora. Estádelo facendo moi ben”.

Tomé Roca destacou o traballo de todas as persoas que prestan atencións nesta e nas outras residencias de maiores de titularidade provincial: “Parabéns polo voso labor, pola vosa entrega e pola calidade das atencións que lle dades aos nosos maiores. Estades coidando a quen nos coidou a nós, e estádelo facendo con toda a vosa profesionalidade e todo o voso agarimo, e iso é o noso maior orgullo. Na Deputación queremos que as persoas que viven nos nosos centros o fagan da forma máis parecida ás súas casas. Vós xogades un papel fundamental neste obxectivo e, polo que sei de primeira man, conseguídelo cada día. Coidádevos tamén moito vós. Apoiádevos nas vosas familias e amigos porque teñen que estar moi orgullosos tamén pola vosa dedicación constante e impecable”.

Unha xornada de celebración
As 40 persoas que residen no Centro de Atención a Maiores de Ribadeo arrancaron a xornada cun pregón que deu a directora do centro, Carmen Rubiños, con motivo deste primeiro aniversario. Durante a mañá realizaron un paseo con photocall, tomaron un aperitivo e participaron en varios xogos que o persoal do centro deseñou de maneira especial para este día.

Este domingo serviuse un menú especial, composto por croquetas de marisco, carrilleiras e tiramisú de sobremesa. Xa pola tarde, proxectáronse os diferentes vídeos de felicitación que chegaron ao centro, entre elas a mencionada do Presidente, e participaron nun bingo e nunha xincana todos xuntos. A festa rematou con música e baile para os máis animados.

“Esta pequena festa fai que deste día unha xornada especial, diferente ás outras, e provoca moita alegría para os nosos maiores porque saen da rutina, como nos pasa a todos, pero a eles se cadra máis porque veñen duns meses de confinamento absoluto, non podemos esquecer que só hai uns días que comezaron a ver aos seus familiares”, José Tomé.

O Presidente da Deputación fixo un balance positivo deste primeiro ano de funcionamento do Centro de Atención a Maiores de Ribadeo. “Hai un par de meses tamén celebrábamos o primeiro aniversario do centro de Trabada e reitero as palabras que dixen aquel día porque é a mesma casuística e eu comprobeino en primeira persoa. Vemos as persoas contentas, ben atendidas e que conviven coma se fosen unha familia”, explica Tomé.

A Deputación, coa súa rede de centros de maiores situados nos concellos de Ribadeo, Pol, A Fonsagrada e Trabada, facilita que “cada persoa poda permanecer no lugar no que fixo a súa vida, convivindo cos seus veciños e veciñas e ser atendido por persoal que na súa maioría é da súa zona e mesmo coñecen”, asegurou.