Acisa amósase satisfeita pola libre mobilidade da que gozará Ribadeo desde o 16 de xullo

 Ribadeo, 15 de xullo de 2020. Acisa amósase satisfeita pola libre mobilidade da que gozará Ribadeo desde o 16 de xullo, desde a vindeira media noite.
O seu presidente, Francisco Iriarte, agarda que “isto supoña o reinicio do verán. Aquí estamos preparados para dar un servizo seguro a visitantes e aos nosos veciños e veciñas. Pouco a pouco se irán reincorporando á nova normalidade e disfrutando da época estival mercando no noso comercio, tomando o vermú, os viños e as cañas nos nosos bares e comendo ou ceando na nosa hostalería”.
Iriarte Quintana dixo: “estamos pendentes do Diario Oficial de Galicia, pero todo apunta a que as restricións de aforos e as limitacións horarias seguirán durante uns días, así como a obrigatoriedade do uso da máscara. Agardamos que todas e todos nos sigamos a comportar ben para así poder poñer fin canto antes a estas prohibicións e que todos os nosos asociados e asociadas poidan recuperar a súa normal actividade. Iso será bo para todos, pero sobre todo para a reactivación da nosa economía. Perdemos a Semana Santa e agora non podemos permitirnos perder todo o verán”.
O presidente de Acisa subliñou: “por iso non me fartarei de pedir sentidiño e responsabilidade a todos os nosos socios e socias, pero sobre todo á súa clientela, que debe lembrar que as máscaras son de uso obrigatorio e de que contan con xeles desinfectantes á súa disposición para empregar cantas veces precisen. Si todos nos comportamos de xeito serio e con civismo poderemos convivir sen problema con esta nova situación”.
Desde a Asociación de Comerciantes, Industriais, Servizos e Autónomos lembran que “onte presentamos o noso novo selo Ribadeo Seguro, un certificado gratuíto que concederemos aos negocios e locais asociados que cumpran coas normas de seguridade e hixiene fronte ao Covid-19, co fin de mostrar ante a veciñanza e os turistas que Ribadeo é un lugar seguro para mercar e consumir”.