Galicia En Común denuncia que o actual modelo de expansión dos parques eólicos é invasivo e supón unha agresión ao patrimonio e un espolio dos recursos

Lugo, 4 de xullo. Nunha xuntanza con Xan Valcárcel, Coordinador da Plataforma de Afectados polos Eólicos de Paradela, Miguel Anxo Fernán Vello coñeceu de primeira man as reivindicacións deste colectivo, que denuncia que “os parques eólicos desfán a gandeiría, desfán o turismo rural e desfán caquera posibilidade de desenvolvemento alternativo”.

Asimesmo comprobou como “hai muíños a só 200m das casas, o cal é completamente ilegal, e outros moi perto do Camiño de Santiago”. O candidato por Lugo de Galicia En Común asegurou que “Estamos coas enerxías limpas e sostíbeis, pero o actual modelo de implantación de parques eólicos en Galicia supón un crime económico que afecta á natureza, ao patrimonio, á paisaxe e á saúde.”

Este “crime económico”, engadiu, “supón é un auténtico espolio”, xa que “o 90% do capital detrás destes parques é estranxeiro, ficando en Galicia moi pouco dos beneficios que se obteñen”.

Para facer fronte a esta situación, Miguel Anxo Fernán Vello aponta que “Para Galicia en Común é de obrigado cumprimento reverter o proceso de agresión e de degradación que leva aparellado este modelo eólico, salvagardando os dereitos veciñais, o patrimonio e a natureza, xunto cunha adecuada promoción do tecido produtivo local e o turismo que vén dado pola existencia do Camiño de Santiago que atravesa a zona e a Ribeira Sacra coa que limita”.