A directora xeral de Comercio visitou os talleres de Artesanía os Muíños, de Mondoñedo

 Mondoñedo, a 19 de agosto de 2020. A directora xeral de comercio e Consumo, Sol Vázquez, visitou esta mañá en Mondoñedo os talleres de Artesanía Os Muíños. Estivo acompañada pola concelleira de Turismo, Elena Candia, deputada autonómica.

Nos espazos visitados hoxe da iniciativa Artesanía os Muíños participan La Esmaltería, Punteiradas Vila de Pedra (cantería), As Formas da Terra (oleiría), Estudio Estampa (serigrafía), Micromina (títeres) e Arte en Ferro.

A directora xeral de Comercio destacou a importancia desta iniciativa que se desenvolve en Mondoñedo desde dous puntos de vista, aínda que estreitamente relacionados. Por un lado, como atractivo turístico, e polo tanto dinamizador da economía local. Por outra banda, Sol Vázquez puxo de manifesto a importancia de estas iniciativas como elementos que axudan a fixar poboación.

Pola súa parte, a concelleira de Turismo de Mondoñedo, Elena Candia, destacou que todos os talleres seguen abertos. Indicou que se cumpren todas as normas sanitarias e invita a visitar e mercar os produtos dos artesáns mindonienses.

Esta iniciativa mindoniense mereceu un premio de Agader en 2005  ao embelecemento do medio rural galego e supuxo un recoñecemento ao esforzo da Asociación de Artesáns Os Muíños, da que forman parte os artesáns e o Concello de Mondoñedo.

Os horarios son os seguintes de luns a venres. Luns e martes: Cantería, 11.00-13.00 e de 17.00 a 20.00; alfar, de 11.00 a 14.00 e de 17.30 a 20.00 horas. Mércores: cantería, de 11.00 a 13.00 horas e de 17.00 a 20.00; alfar, de 11.00 a 14.00 e de 17.30 a 20.00; serigrafía, de 12.00 a 14.00 e de 16.00 a 18.00. Xoves e venres: cantería, de 11.00 a 13.00 horas e de 17.00 a 20.00; alfar, de 11.00 a 14.00 e de 17.30 a 20.00; serigrafía, de 12.00 a 14.00 e de 16.00 a 18.00; títeres, de 11.00 a 13.30 horas e de 17.00 a 19.30. Sábado: cantería, de 11.00 a 13.00 e de 17.00 a 20.00; alfar, de 11.00 a 14.00 horas e de 17.30 a 20.00 horas; serigrafía, de 12.00 a 14.00; títeres, de 11.00 a 13.30 horas e de 17.00 a 19.30. Domingo: títeres de 11.00 a 13.30 horas e de 17.00 a 19.30. Arte en ferro é unha exposición exterior permanente. Adxúntase o programa oficial dos talleres.