O Grupo de Acción Local do Sector Pesqueiro A Mariña Ortegal recoñece a labor das mulleres do mar nun acto en Celeiro

 Viveiro, 17 de decembro de 2020.- O Grupo de Acción Local do Sector Pesqueiro (GALP) A Mariña-Ortegal organizou un acto de recoñecemento aos colectivos de mulleres do mar do territorio, co obxectivo de poñer en valor a súa labor e dar unha maior visibilidade ás agrupacións e asociacións de mulleres do sector pesqueiro.

O acto comezou coa benvida de Alfredo Llano, Vicepresidente do GALP, que destacou o apoio do grupo ás iniciativas do sector pesqueiro en materia de igualdade de xénero. Susana Rodríguez, Directora Xeral de Desenvolvemento Pesqueiro, puxo de manifesto a importancia das mulleres na cadea mar – industria, no espírito asociativo de mariscadoras e redeiras, e no seu compromiso na defensa dos seus intereses. Jesús Fernández, Conselleiro do mar do Concello de Viveiro, destacou a importancia de desenvolver proxectos que dean maior visibilidade ao labor das mulleres do mar.

A voz das mulleres do mar foi representada por Mª Jesús Alonso, presidenta da Asociación de Redeiras Cabo Burela; Mª Luisa Loureiro, presidenta da Asociación de Redeiras de Cedeira; e Isabel Rodríguez, da Agrupación de marisqueo a pé da Confraría do Barqueiro. Entre as tres estableceron unha conversa sobre os avances acadados en termos de igualdade nos traballos que desenvolven,

lembraron a mulleres referentes do sector, e puxeron de manifesto os retos aos que se enfrontan ambas profesións, destacando a importancia de valores coma o asociacionismo, a cooperación, a resistencia e capacidade de superación das mulleres do mar fronte os obstáculos.

A directiva do GALP entregou un recoñecemento simbólico ás asociacións e agrupacións participantes no proxecto: Asociación de Redeiras Cabo Burela, Agrupación de marisqueo a pé da Confraría do Barqueiro, Asociación de Redeiras de Cedeira, Agrupación de marisqueo a pé da Confraría de Cedeira, e á Asociación de redeiras de Cariño. O GALP quixo agradecer ás participantes do proxecto as conversas e lembranzas que serviron de fío conductor para construír esta iniciativa da memoria colectiva das mulleres do mar na Mariña Ortegal.

Para rematar o acto, un cuarteto de corda formado por Juan, Zumela, Luis e Eva -intérpretes do Conservatorio de Viveiro- tocaron tres pezas musicais. A directiva do GALP agradeceu a entidade a súa participación neste acto, incidindo en que a súa presenza aportou ao peche do proxecto un toque moi emotivo.