Alfredo Llano felicita a Astilleros Armón e ao Pescados Rubén BFSF

Burela, 7 de decembro de 2021. O alcalde, Alfredo Llano, destaca o traballo realizado por Astilleros Armón, empresa instalada na localidade desde o ano 1992, tras a botadura dun novo megaiate de luxo. Trátase de o Nebula. O rexedor subliña o rigor e o compromiso desta firma á que felicita pola súa forma de traballar.

O alcalde declara que “Astilleros Armón está instalado no noso concello desde o ano 1992 e veu co obxectivo claro de facer naves cada vez mellores e moi diversas porque tanto fai pesqueiros como iates e megaiates. Todo o que se propón sácao para adiante porque hai moito rigor, moito traballo e moito compromiso moi ben organizado. É un exemplo claro de como hai que traballar”.

Llano dixo: “quérolles dar os parabéns a toda aquela xente que dunha forma ou doutra intervén na construción de naves, desde os dirixentes ata aos traballadores porque lle dan unha solvencia a Burela e tamén á construción naval. Penso que é moi importante que saque este tipo de naves, como a última que ten agora atracada no porto de Burela, que se chama Nebula. É un megaiate que ten todas as facultades para presumir da boa construción deste buque. Ademais xa leva incorporado cousas que a min me parecen moi importantes como o respecto ao medio ambiente, os motores xa van pensados para que contaminen o menos posible e tamén tratan dun xeito especial o lixo e a auga. Así que as novas tecnoloxías se impoñen e o criterio que se debe estimar importante para esta construción. Así que parabéns para Astilleros Armón por esta nova criatura que acaban de botar no porto de Burela”.

Burela FSF
O alcalde burelés felicita ao Burela FSF que esta pasada fin de semana se proclamaba Campión de Europa en Lugo, ata onde se desprazaron centos de afeccionados para animar ás guerreiras laranxas que seguen a recoller novos éxitos. O rexedor salienta que “é importantísimo para nós. Ven sendo habitual, é unha costume, pero aí está o fútbol sala feminino do noso concello, o Burela FSF. Eu tiven o pracer de estar o outro día na final onde o único que fixeron foi amosar a súa forma de traballar e a súa forma de xogar con elegancia, categoría e compromiso. Dan moi bo sabor de boca e debemos estar todos os veciños e as veciñas de Burela contentos con todos estes acontecementos deportivos, que son moi motivadores para todo aquel ao que lle guste o deporte. Parabéns para o Burela FS feminino, para o seu club e para toda a veciñanza de Burela porque penso que hai moita repercusión e moito detrás destas vitorias que non é, nin máis nin menos, que a boa afección que hai no noso concello e viuse plasmado o domingo no pavillón en Lugo que estaba abarrotado de xente de Burela. Así que parabéns para eles, é unha maneira moi bonita de saír nos medios grazas a estes acontecementos que lle dan moita importancia ao noso concello”.

Fibra de alta velocidade
O alcalde, Alfredo Llano, anuncia que “agora mesmo estamos seleccionados para a instalación de fibra de alta velocidade no noso concello. Xa levan tempo colocando fibra para ter unha boa transmisión e unha alta velocidade no noso concello. É algo moi bo porque presta un servizo grande pensando na aplicación de novas tecnoloxías, sobre todo transmisión e información. Penso que Burela, por estas razóns e outras que virán, sería un bo exemplo de como hai que facer as cousas”.