O PP de Foz pide a convocatoria urxente da xunta de portavoces municipais para analizar como afectará a central hidroeléctrica prevista en O Valadouro á captación da traída de auga

Foz, 8 de febreiro de 2022. A proxectada construción dunha central hidroeléctrica en O Valadouro, contrariamente ao que asegurou o alcalde de Foz, si afectará a este municipio. O grupo municipal do PP reclama a convocatoria urxente dunha reunión da xunta de portavoces, na que participen os técnicos municipais. O PP ve claro que o Concello ten que presentar alegacións a este proxecto e, de non facelo, o PP estudará facelo pola súa conta. Así o explica o portavoz dos populares no Concello, Javier Castiñeira: “Ante a pasividade do equipo de goberno do Concello de Foz, tanto do señor Cajoto como dos seus socios do BNG, con respecto á hidroeléctrica que hai proxectada no concello de O Valadouro, que captará a auga para encher os seus encoros do río Ouro, o PP entende que o asunto é grave e que o Concello ten que tomar decisións”. Os populares piden a convocatoria dunha xunta de voceiros na que participen os técnicos do Concello para analizar a afección directa desta obra sobre a captación para o abastecemento do municipio, un servicio básico do que se nutre a práctica totalidade do Concello de Foz”.

Castiñeira sinala: “Falamos de números moi grandes. Un exemplo déixao claro: o Concello ten unha concesión para captar auga no Ouro de 100 litros por segundo e agora a empresa hidroeléctrica solicita 450 litros por segundo, é dicir, 4,5 veces máis do que consume Foz durante todo o ano”. Engade: “Falamos de números moi grandes e está claro que non é como nos dixo o propio alcalde, que asegurou que este proxecto non afecta a Foz e que polo tanto non se ía mover”. Hai catro días, o socialista Fran Cajoto dixo que non presentaría alegacións porque a central hidroeléctrica estará noutro concello.

O portavoz popular está convencido de que a do alcalde “é unha posición absolutamente equivocada, coa que intenta protexer a posición dos alcaldes socialistas de O Valadouro e Alfoz”.

Castiñeira avisa: “O Concello de Foz xógase moito e pedimos unha xunta de voceiros urxente, cos técnicos municipais, para valorar o proxecto e a afección que ten sobre o río Ouro. Se o Concello de Foz non presenta alegacións e probable que o PP teña que facelo e non sería o normal; o normal é que as faga o Concello porque este proxecto afecta a un servizo básico como é o abastecemento de auga”.