O BNG urxe axudas á frota galega, exonerar as taxas portuarias e rebaixar o IVE dos produtos do mar ante a crise de prezos

Santiago de Compostela, 24 de marzo de 2022. A portavoz de Pesca do BNG, Rosana Pérez e o alcalde de Rianxo, Adolfo Muiños mantiveron un encontro co Patrón Maior da Confraría de Rianxo, Miguel Iglesias co fin de analizar as distintas alternativas para paliar as consecuencias económicas da suba de prezos sobre a flota pesqueira.

Hoxe, explicou a deputada nacionalista ante os medios de comunicación, a flota volveu a retomar a actividade tras unha reunión do sector co Ministro de Pesca, unha reunión, dixo, que xa tiña que terse celebrado hai tempo para tomar medidas e a pesar disto, a dia de hoxe segue sen haber , “hai medidas concretas”.

Neste sentido, explicou que a exoneración das taxas portuarias que dependen do Estado e a da Xunta nos portos autonómicos, “continua sen poñerse en práctica” e lembrou que durante a pandemia o goberno galego mantivo unha exoneración de taxas que pasados os meses foi “cobrada acumuladamente ás confrarías”. Dende o BNG rexeitamos esta medida porque “non supón ningún beneficio para as instalación dos portos autonómicos” e de nada vale, reiterou, que “apracen un pago que logo será cobrado.

O Ministro de Pesca, engadiu a deputada, non realizou ningún compromiso e só aludiu ás axudas dependentes do fondo de Pesca da Unión Europea, axudas, ao seu xuízo, “difíciles de tramitar e executar”, polo tanto, tampouco resultan unha solución a curto prazo.

Pérez lembrou que a flota pesqueira deu a voz de alarma hai máis dun ano advertindo das consecuencias polo encarecemento do prezo dos combustibles ao pasar de pagar 0,55 euros a 1,20 polo gasoleo. A maiores, a este encarecemento hai que engadir o resto de produtos que tamén tiveron un incrementos de “máis do dobre”.

A deputada denunciou que a día de hoxe, “non existe ningunha proposta real” para superar a crise da flota. Neste liña, propuxo a exoneración das taxas portuarias de “maneira inmediata” por parte da Xunta e do Estado e a posta en marcha , sen máis dilación de “compensacións económicas” polo amarre da flota e futuros amarres.

Ademais, engadiu, tanto a Xunta como o goberno español ten a obriga de impedir que o gasoil da flota pesqueira continúe subindo. Rosana Pérez tamén reclamou a redución do IVE nos produtos pesqueiros ao 4%.

A nacionalista criticou a “propaganda e anuncios do Goberno galego” ante unha situación excepcional e a “ parálise” a hora de poñer en marcha medidas urxentes contra a crise da flota pesqueira. “Non é de recibo que despois dun mes de anunciar medidas non fora posta en marcha ningunha”.

Pola súa parte, o alcalde de Rianxo, Adolfo Muíños insistiu nas dificultades económicas de todos os sectores ante a escalada de prezos e, de maneira especial, os relacionados coa pesca. Muíños criticou os “beneficios” das empresas subministradoras de enerxía e combustible, elementos imprescindibles para desenvolver as actividades como a pesca no concello de Rianxo. O BNG, dixo, seguirá traballando para a que “a nosa flota poida faenar con normalidade” e ofrecer aos traballadores do mar e a súas familias as axudas necesarias.