O PP, convencido de que PSOE e BNG rexeitaron no pleno da Deputación as súas propostas para paliar a crise na provincia “co fin de reservar cartos para convenios só cos seus concellos”

Lugo, 29 de marzo de 2022. Contrariamente ás optimistas perspectivas coas que os deputados do PP entraron na sesión plenaria de hoxe na Deputación, o resultado final foi, de novo, decepcionante. O goberno presidido polo socialista José Tomé demostrou, unha vez máis, a súa incapacidade para recoñecer os graves problemas da provincia e, escudándose de novo no falso argumento da incapacidade económica do organismo provincial, evitou o compromiso cos lucenses, cos seus concellos e cos sectores produtivos máis afectados pola crise. Socialistas e nacionalistas uniron un pleno máis os seus votos e rexeitaron as mocións do PP nas que se propoñía un suplemento do Plan Único, para compensar a perda de poder adquisitivo polos concellos, debida á inflación, e outra para apoiar aos sectores produtivos máis afectados. Os populares indican que o goberno provincial “hoxe di que non ten cartos, pero dentro dunha semana si que os terá para facer convenios cos seus concellos, máis de 3,3 millóns de euros; van tirar do remanente, que podía ir para todos os concellos, e desta maneira o reparto non vai ser obxectivo, porque o único criterio vai ser o de sempre, o dedo do señor Tomé”.

O portavoz popular, Javier Castiñeira, declarou ao final da sesión: “Lamentablemente vemos un goberno da Deputación absolutamente inoperante; eles mesmos recoñecen a súa falta de competencia. O certo é que a Deputación de Lugo, que é un ente moi importante para a provincia, dispón de multitude de fondos, non só dos orzamentos provinciais (este ano subiron máis de sete millóns de euros), senón dun amplo remanente e incluso de ampla capacidade financeira para poder tomar decisións”.

Castiñeira di que a postura mantida polo goberno provincial non responde a “unha cuestión de cartos, é unha cuestión de vontade, de falta de vontade”. Engade: “Cando lles toca a eles ser executivos, poñerse as botas para traballar, prefiren de novo botar as culpas á Xunta de Galicia”. Medidas, di Castiñeira, “que podían ser executivas na semana que vén, merecen o voto en contra do goberno da Deputación; vota en contra dun suplemento do Plan Único para os concellos e vota en contra tamén de axudas para os sectores produtivos afectados pola inflación”.