O PP intenta que o goberno da Deputación exprese o seu rexeitamento ao intento do Executivo central de suprimir paradas de liñas nacionais de autobús na provincia de Lugo

Lugo, 26 de abril de 2022. O grupo provincial do PP vese outra vez na necesidade de intentar que a Deputación exprese o seu rexeitamento a unha iniciativa do Goberno central, en defensa dos intereses da provincia de Lugo. No pleno que este martes celebra a corporación provincial os populares defenderán unha moción para reclamar cambios nas previsións do Goberno en canto á supresión de paradas en liñas estatais de autobuses ao seu paso por Lugo. O portavoz provincial dos populares, Javier Castiñeira, sinala: “Unha vez máis a provincia de Lugo, e, polo tanto, a gran maioría dos lucenses, son os prexudicados pola nefasta política do goberno socialista de Pedro Sánchez. Dicimos isto polo anteproxecto da Lei de Mobilidade Sostible, que inclúe un novo mapa de concesións de transporte público, que é moi prexudicial para a provincia de Lugo, porque suprime paradas en itinerarios importantes”.

Castiñeira destaca as previsións para suprimir paradas en itinerarios como é o da A-6: Guitiriz, O Corgo, Baralla, As Nogais e Pedrafita do Cebreiro. Tamén noutros itinerarios, nos que se suprimen paradas en Palas, Chantada, Quiroga e Monterroso. Sinala que estas supresións “prexudicarían a gran número de veciños da nosa provincia desas comarcas e da contorna, que terían dúas opcións, ou ben facer transbordos, o que suporía un claro retroceso, ou desprazarse trinta ou corenta quilómetros cara outras poboacións con máis habitantes”.

Os populares consideran que tales previsións “van totalmente en contra dos intereses da provincia de Lugo”. Destacan que “esta lei non ten en conta a mobilidade rural, non atende aos intereses do territorio e unicamente se rexe por criterios económicos, de rendibilidade ou por razóns que benefician ás grandes urbes ou ás zonas metropolitanas”.

Castiñeira avisa de que “o grupo provincial do PP defenderá sempre os intereses do medio rural, como vimos facendo; por iso, presentamos unha moción que debateremos hoxe e esperamos que sexa apoiada por todos os grupos”. Lembra que os populares “xa presentamos no seu momento alegacións a este anteproxecto de lei, porque ademais de prexudicar directamente aos veciños da provincia, tamén abre as portas para que se poida cobrar polo uso das autovías”. Ter que pagar por usar as autovías, “sería tremendamente malo para a provincia de Lugo, para o seu desenvolvemento económico, social e estrutural”. Suporía que “de novo o tecido económico lucense, os veciños de Lugo, pagarían dobremente estas infraestruturas; os veciños da provincia de Lugo volven ser os grandes prexudicados”.