O Ministerio de Transportes, Mobilidade e Axenda Urbana saca a licitación a redacción do proxecto construtivo e a execución das obras por un importe de 24,2 millóns de euros
Lugo, 9 de xuño de 2022. A subdelegada do Goberno en Lugo, Isabel Rodríguez, celebrou hoxe o “paso decisivo” para a mellora das comunicacións por ferrocarril na comarca da Mariña que dá o Ministerio de Transportes, Mobilidade e Axenda Urbana coa licitación da redacción do proxecto construtivo e a execución das obras de supresión do bloqueo telefónico no tramo de Ortigueira a Ribadeo. Trátase dun importante proxecto que o Ministerio saca a licitación por un importe de 24,2 millóns de euros (IVE incluído).
A subdelegada destacou que “cumprindo o que prometeramos, o Ministerio de Transportes saca a licitación este proxecto que supón un paso definitivo para a mellora do ferrocarril de ancho métrico e a demostración de que, como sempre dixemos, este Goberno aposta pola Mariña e pola provincia de Lugo”.
“Este Goberno cumpre o que promete e atende unha vella demanda dos veciños da Mariña como é a mellora do servizo que presta o ferrocarril nesta comarca”, destacou a subdelegada. Rodríguez recalcou que “temos un compromiso coa mellora das comunicacións, tamén por ferrocarril, e atendémolo desde os Presupostos Xerais do Estado e co Boletín Oficial do Estado, que xa publicou o anuncio desta importante actuación que permitirá mellorar a seguridade e a fiabilidade da liña, como xa se está facendo coas obras en marcha execución no tramo de Ferrol a Ortigueira.
24,2 MILLÓNS DE INVESTIMENTO
Esta actuación ten un valor estimado de 24.214.024,60 euros (IVE incluído) e un prazo de execución previsto de 27 meses.
O tramo Ortigueira-Ribadeo, que forma parte da liña de ancho métrico Ferrol- Pravia, ten unha lonxitude de 101 km entre a estación de Ortigueira e o viaduto da Ría de Ribadeo, en vía única non electrificada. Este tramo está dotado de sistema de axuda á condución de Anuncio de Sinal e freado Automático ( ASFA) analóxico e bloqueos telefónicos entre as estacións lindeiras.
O obxecto desta actuación é o equipamento das instalacións de seguridade e comunicacións necesarias para substituír o actual bloqueo telefónico do tramo mencionado, por bloqueo automático tipo BLAU regulados por telemando desde o Centro de Regulación de Circulación ( CRC) do Berrón (Asturias).
Así mesmo, neste proxecto recóllese o equipamento necesario para as novas configuracións previstas coa racionalización das estacións existentes no traxecto, incluíndo as novas estacións no Barqueiro e Barreiros.
Para iso, o proxecto inclúe a instalación de sistemas de encravamentos electrónicos, bloqueos automáticos en vía única, e sistemas de telecomunicacións en todas as estacións do tramo.
Ademais, procederase a substituír o equipamento de vía do sistema ASFA analóxico polo sistema ASFA dixital, e sinais convencionais por sinais de focos tipo led.
TODA A REDE DE ANCHO MÉTRICO GALEGA AUTOMATIZADA
A execución do proxecto de supresión de bloqueos telefónicos do tramo Ortigueira-Ribadeo completará a automatización de toda a rede de ancho métrico de Galicia.
Adif está a executar xa as obras de supresión de bloqueos telefónicos no tramo Ferrol-Ortigueira (na mesma liña de ancho métrico Ferrol- Pravia), que supuxeron un investimento de máis de 13 millóns de euros. A instalación de bloqueos automáticos na rede de ancho métrico de Galicia e o control de tráfico mediante telemando desde o CRC do Berrón (Asturias) permitirá melloras substanciais na explotación ferroviaria, fundamentalmente maior capacidade da liña e regularidade nas circulacións dos trens, así como unha mellora notable da seguridade e fiabilidade das instalacións.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
