As persoas que exercen un determinado posto de responsabilidade, chegado un momento, tras anos de ostentar o poder, poden padecer “mal de altura”(non sempre, afortunadamente). Comeza entón o distanciamento da realidade, cos seus concidadáns, a percepción de que se está en poder da única e absoluta verdade. Iso tenlle pasado a quen ocupou a presidencia do goberno, de autonomías , de grandes e pequenos concellos e, moito me temo, está a pasarlle ao noso alcalde de Cervo, o Sr Alfonso Villares.
Aínda que xa viñamos apreciando os síntomas desde hai tempo, o exemplo mais claro tivémolo o pasado xoves, no último pleno do Concello. Entre os puntos da orde do día dese pleno estaba unha moción presentada, ao igual que no resto dos Concellos da Mariña, pola Plataforma en Defensa da Sanidade Pública da Mariña. A moción en cuestión solicita o apoio das corporacións para instar á Xunta de Galicia a solucionar a situación de emerxencia que padece o servizo de Saúde Mental na nosa comarca. As demandas que aparecían na moción, os datos e argumentacións que xustificaban a mesma, foran recollidos en diversas reunións cos profesionais deste servizo. Polo tanto a súa veracidade e oportunidade están fora de toda dúbida. Tanto é así, que foi aprobada por UNANIMIDADE (isto é, cos votos a favor do PP) en Alfoz, Barreiros, Ourol e Viveiro. En outros concellos (Foz, Valadouro, Ribadeo) o PP abstívose facilitando a súa aprobación, incluso, como no caso de Mondoñedo, sendo o grupo maioritario.
Pero en Cervo o PP votou en contra. Algo tan lexitimo como incomprensible. Non só polo feito de ser unha “anomalía” incluso entre os seus compañeiros de partido comarcais, senón polas formas e o ton do seu discurso no Pleno. Estando presente un veciño de Cervo, membro activo da Plataforma Sanitaria en calidade de Presidente dunha Asociación de veciños, a voceira do PP primeiro, e o Sr Alcalde despois, puxeron en cuestión todo o que na moción se recollía, chegando a acusar de mentireira e manipuladora á Plataforma. Iso si, “desde o respecto”, dixeron. O Alcalde sentenciou que non estaba de acordo con “NINGÚN plantexamento da Asociación”.
Nese mesmo Pleno, momentos antes, debateramos outra proposta, esta do Alcalde, na que se lle pedía ao ESTADO a toma de medidas urxentes en materia de atención primaria. Desde o BNG criticamos con dureza a parcialidade do PP neste punto, esquecendo á Xunta e as súas competencias nesta materia, esquecendo que foron políticas dos gobernos do PP no Estado, políticas de recortes, de reposición cero, de xubilacións forzosas, de privatizacións, etc. as que levaron á atención primaria a esta situación tan precaria, esquecendo que cando o seu partido gobernou o Estado non se lembraron de lexislar o que agora reclaman. A pesar de todas estas discrepancias, votamos a favor da súa moción,sabendo que é parcial e interesada e que non afronta o problema da atención primaria na súa totalidade. Pero no BNG, en cuestións tan importantes como esta, non imos xogar ao despiste e imos apoiar calquera reclamación que teña como obxectivo a defensa e mellora da sanidade pública, veña de onde veña e vaia dirixida a quen vaia.
E, para rematar a xornada, o PSOE presentou unha moción de urxencia reclamándolle á Xunta a mellora da atención primaria en CERVO, dando cobertura á praza que se atopa vacante por xubilación e recuperando a atención todos os días da semana para o consultorio de Cervo. Novamente o Alcalde e o grupo do PP votaron en contra desta moción. Votaron en contra, incluso, de que fora sometida a consideración no Pleno. Votaron en contra de centos de veciños e veciñas que días antes presentaran (coa axuda da Plataforma Sanitaria)reclamacións no Sergas coas mesmas demandas. A xustificación a tal postura foi a peregrina desculpa de que “se non hai médicos a culpa é do Estado”.
Hai dúas formas de exercer un cargo político: para axudar a mellorar as condicións de vida da veciñanza ou para envolverse en proclamas simplistas e defender cegamente ao teu partido político. O Alcalde de Cervo xa hai tempo que optou por esta última.
Diego Fernández Martínez, voceiro do BNG de Cervo
A proba, organizada polo CP Altrúan, reuniu máis de 130 palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García entregou os premios da proba, na que Club Fluvial de Lugo, Cidade de Lugo e Altruán coparon o podio por equipos. A Copa Deputación de Piraguismo, que conta de 6 regatas, organízase no marco da colaboración que a Vicepresidencia da Deputación de Lugo mantén coa Federación Galega de Piragüismo para a promoción deste deporte, ofrecendo aos clubs a posibilidade de participar en competicións federadas nas súas comarcas e contribuíndo así á consolidación de equipos de base.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
Pasada a medianoite, un vehículo saíuse da vía na N-634. Como consecuencia do impacto, tres persoas resultaron feridas. Da asistencia sanitaria ocupáronse os profesionais de Urxencias Sanitarias de Galicia-061 e os axentes da Garda Civil de Tráfico da seguridade na vía. Os Bombeiros de Barreiros tamén acudiron, sen embargo, ningún dos feridos estaba atrapado.
