Ampliadas en 125 metros as beirarrúas de Cangas de Foz en ambas marxes da estrada LU-162

O delegado territorial de Lugo, Javier Arias, explica que o Goberno galego leva investidos máis de medio millón de euros para habilitar un itinerario de peóns seguro neste núcleo de poboación

Foz, 7 de febreiro de 2023. A Consellería de Infraestruturas e Mobilidade está a executar obras de ampliación de beirarrúas na estrada LU-162 en Cangas de Foz, en 125 metros entre os puntos quilométricos 11,125 e 11,250. foron ampliadas

O delegado territorial da Xunta en Lugo, Javier Arias, comprobou hoxe a marcha dos traballos, que contan cun orzamento de 48.400 euros.

Lembrou que esta partida eleva a máis de medio millón de euros (504.300 euros) o investimento realizado polo Goberno galego na construción de case un quilómetro de beirarrúas neste núcleo de poboación focego, ao longo da citada estrada autonómica.

En concreto, con esta nova actuación complétanse 910 metros lineais de beirarrúa en cada marxe. Deste xeito, os veciños e veciñas dispoñen dun itinerario peonil seguro na travesía, desde o inicio da vía na intersección coa estrada N-642.

Arias destacou que o Goberno galego favorece unha mobilidade sostible mediante a construción de beirarrúas e sendas peonís que melloran a seguridade viaria, tanto para os vehículos como para os peóns.

O PP de Foz pon en valor a rapidez coa que a Xunta atendeu a petición da Asociación de Veciños e Montes de Cangas para executar este último tramo das beirarrúas da LU-162

O portavoz municipal do Partido Popular, Javier Castiñeira, “indica tal como nos anticipou no seu día o delegado da Xunta, Javier Arias, na reunión co grupo municipal popular, nesta semana comezaron os traballos dunha nova fase das beirarrúas de Cangas, concretamente na LU-162. Son parte dun proxecto que xa está executado na súa maioría; estando no goberno local o PP, en varias fases, construíronse preto de 800 metros de beirarrúas por cada lado; agora construiranse 220 metros lineais, divididos nos dous sentido”. Castiñeira explica que “así se completa unha obra de mellora da seguridade, especialmente para protección dos peóns; é unha obra que pediu a Asociación de Veciños e Montes de Cangas e que xestionou o PP, que a considera unha necesidade”.

Os populares agradecen “a dilixencia por parte da Delegación da Xunta de Galicia, concretamente pola Consellería de Infraestruturas”. Castiñeira destaca que o inicio dos traballos “é unha boa nova para esta parroquia, a máis grande que ten Foz, despois do núcleo urbano; é unha parroquia que ten case mil habitantes”. Lembra que “é unha das vías fundamentais para os veciños de Cangas e para os de Cordido”.

Castiñeira sinala: “O PP sigue traballando en positivo e o claro exemplo é a parroquia de Cangas: xestionamos a construción pola Xunta de gran parte destas beirarrúas cando estabamos no goberno local e seguimos facéndoas aínda estando na oposición”.