O PP cre que Tomé usará 5,1 millóns, que deberían ser para ampliar o Plan Único, para beneficiar electoralmente a concellos gobernados polo PSOE e o BNG

Os populares sinalan que, dos 49 convenios que se firmaron no pasado exercicio, 35 foron para alcaldes socialistas (case 4,2 millóns); un millón de euros, en doce convenios para concellos do BNG, que só goberna en catro; un único convenio entre os 32 concellos gobernados por alcaldes do PP”

Lugo, 28 de febreiro de 2023. De novo, o goberno provincial dedica unha moi significativa cantidade (5,1 millóns) a fins claramente electoralistas. O portavoz popular, Javier Castiñeira, di que no pleno que hoxe celebra a corporación provincial “vénse a confirmar a falta de vontade que ten o goberno da Deputación de Lugo, o bipartito PSOE-BNG, para ampliar o Plan Único, que reparte 21,5 millóns de euros neste ano, que é exactamente a mesma cantidade que no 2022; polo tanto, non é que estea conxelado, é que é unha devaluación clara dos fondos de cooperación cos concellos, posto que a vida subiu e son moitas menos as obras que se poden facer”.

Castiñeira lembra que, “cando se aprobou o Plan Único, o PP pediu que se pasase dos 21,5 millóns ata chegar polo menos a 25; o goberno provincial dicía entón que como se ía ampliar a dotación do plan, porque non había cartos e de onde os ían sacar”. Engade: “Nós dixemos que se podían sacar dese remanente que usan sempre para convenios de Presidencia; como todos os anos, tamén neste pleno veñen cinco millóns de euros, mediante modificación do orzamento, que deberan ser para ampliar o Plan Único”.

Os populares lamentan que a citada cantidade sexa “para eses convenios que teñen obxectivos partidistas e electoralistas”. Castiñeira explica: “Son convenios directos a alcaldes amigos, que deixan fóra á metade da poboación da provincia. Unha vez máis, demóstrase que si había posibilidade de ampliar o Plan Único, pero non quixeron; é unha cuestión de vontade política, porque PSOE e BNG prefiren repartir eses cartos nos concellos que eles desexan e non entre todos”. A mellor proba de que é así –din os populares- “ son os convenios de 2022: dos 49 convenios que se firmaron no pasado exercicio, 35 foron para alcaldes socialistas, con un valor de case 4,2 millóns de euros; un millón de euros, en doce convenios, para concellos do BNG, que só goberna en catro; un único convenio entre os 32 concellos gobernados por alcaldes do PP. Esa é a demostración da falta de obxectividade deste equipo de goberno”.

Castiñeira di: “Lamentablemente estes 5,1millóns de euros, que van aprobar hoxe, co voto en contra do PP, que deberían ir ao Plan Único, irán para facer política electoralista; pola falta de transparencia, o PP vai votar en contra”.