Crítica que os que agora veñen de xira electoral son os mesmos que queren converter este País nunha colonia enerxética de Madrid
Santiago de Compostela, 29 de Abril 2023. A portavoz nacional, Ana Pontón, destacou no encontro inteparlamentar con candidatos e candidatas en Santiago que o BNG vai ter un resultado “histórico” na cita electoral municipal porque, tras meses percorrendo concellos ao longo e ancho do País, percibe que a corrente de apoio ao Bloque non fai máis que medrar.
“Son días de moita intensidade, traballo e ilusión, a mesma ilusión que o BNG esperta cada vez en máis galegos e galegas que ven en nós a alternativa para derrotar ao PP na Xunta e construír unha Galiza forte, e imos facelo concello a concello, vila a vila, cidade a cidade, porque hoxe o BNG representa o entusiasmo, a vitalidade, o empuxe e o optimismo que tanto necesita Galiza e a xente deste País. Imos ter un resultado histórico”, proclamou Pontón.
A líder do Bloque bota man do aval que supoñen os concellos gobernados polo Bloque en base a un modelo municipal de éxito, “que funciona e que se ten convertido nun referente dentro e fora de Galiza porque pensamos os nosos concellos en grande”, recalcou, modelo que sintetizou en catro claves: confianza no País, proxecto de vangarda, eficacia na xestión e democracia participativa da cidadanía.
“Os nosos gobernos municipais son un éxito porque teñen amor e confianza no País, a firme convicción de que se pode vivir mellor en todos e cada un dos concellos e transforman en positivo superando todas as barreiras e todos os obstáculos, sobre todo a barreira do pesimismo, a barreira do marco mental da resignación que predican esas forzas estatais que non confían en Galiza e que sempre miran para Madrid”, destacou Pontón.
As mesmas forzas, PP e PSOE, cuxos xefes de filas chegan agora “de xira electoral, a facer mitins, que é basicamente cando se acordan deste País”, criticou, pero que se alternan na discriminación a Galiza. “Son os mesmos que queren converter Galiza nunha colonia enerxética de Madrid a través do espolio eólico do noso monte e do noso mar; os que nos discriminan na chegada do AVE, os mesmos partidos que boicotean unha AP9 galega e libre de peaxes, os mesmos que discriminan aos concellos galegos no financiamento por habitante e os que nos deixan fora dos fondos de recuperación económica”, denunciou.
En contraposición, o BNG “confía no enorme potencial deste País e da súa xente, nas nosas propias forzas e esa confianza é unha das claves do éxito do modelo noso municipal”, destacou. A segunda clave do modelo municipal do Bloque é ter un proxecto de vangarda que aplica aos grandes retos que hai sobre a mesa, como o cambio climático, a transición enerxética, a mobilidade sustentable a defensa de servizos públicos de calidade, a importancia de ciencia e do coñecemento.
Da decadencia a ser referentes
“Cantos concellos que estaban en decadencia pasaron a ser un referente da man dun goberno do BNG? Os concellos que gobernamos iniciaron un camiño de futuro, de ilusión, de avance e nese avance sumamos cada vez a máis amplas capas da sociedade, da veciñanza”, recalcou.
A terceira clave do éxito é a eficacia na xestión dos gobernos municipais “que xestionan con transparencia e con eficacia cada euro, transformando en positivo e mellorando a vida das persoas, conseguindo concellos que funcionan, con dinamismo no económico, no social e no cultural”. E como cuarta clave, a democracia participativa, con alcaldes e alcaldesas liderando corporacións que fomentan a participación da veciñanza nos asuntos públicos, “son profundamente democráticos, onde todas as persoas son tratadas por igual”.
“Estas catro claves: confianza no País; proxecto de vangarda, eficacia na xestión e democracia son as bases do modelo municipal de éxito do BNG, un modelo propio e xenuíno que queremos estender por toda Galiza”, subliñou a líder nacionalista.
Gran salto adiante
Pontón tamén puxo en valor o capital humano cun recoñecemento expreso aos 4.500 homes e mulleres que compoñen as 265 listas presentadas, unha cifra record que lle vai permitir ao 98% dos galegos e das galegas ter unha candidatura do BNG na próxima cita coas urnas.
“Levo meses percorrendo Galiza en actos de presentacións de candidaturas e cada día que pasa, cada día que nos achega ao 28 de maio noto máis enerxía, más forza e mais ilusión co BNG, por iso estou convencida de que imos dar un grande salto adiante, multiplicando a representación, ampliando os gobernos, consolidando as bases dunha nova Galiza, porque estamos no mellor momento da nosa historia. Así que a por todas nesta campaña, sen poñernos límites e a gañar un futuro mellor para este País, concello a concello”, concluíu.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
