Lugo, 5 de decembro de 2023. A área de Cultura de Vicepresidencia da Deputación continúa co Circuíto de Teatro Afeccionado que esta semana achégase a seis concellos da provincia. As representacións están previstas en: Outeiro de Rei, Riotorto, Cospeito, Pol, O Valadouro e Barreiros.
Axenda e notas sobre as obras
Fuga (57 PALABRAS)
Sábado 9 de decembro | 17:00h | LOCAL SOCIAL DA ASOCIACIÓN PENA DE RODAS (OUTEIRO DE REI)
Comedia de acción. Público a partir de 14 anos.
Autoría: Jordi Galcerán
Dirección: Patricia Neira
Duración: 80 min.
Sinopse:
Nesta historia ninguén é o que parece. Un grupo de timadores intenta estafar a un político caído en desgracia pola súa ambición, pero este tampouco é tan parvo coma eles pensan, ou iso cre el. Con este fio argumental, abórdanse temas serios cun tono de humor, como a infidelidade, a corrupción, a dependencia, a avaricia e a procura do amor. A intriga manterase ata o final.
O menciñeiro á forza (OS PÍCAROS DA LAGOA)
Sábado 9 de decembro | 18:00h | LOCAL SOCIAL DA ANTIGA ESCOLA DE ÓRREA (RIOTORTO)
Comedia. Todos os públicos.
Autoría: Adaptación de Carballo Ferreiro
Dirección: Os Pícaros da Lagoa
Duración: 90 min.
Sinopse:
Unha muller farta do seu marido folgazán, trama un escarmento porque non o atura máis.
Ao final todo acaba ben, pero non se pode contar máis, a historia ten moralexa, quen a queira
saber, a obra ten que ver.
De poucas luces (O CENTIÑO)
Sábado 9 de decembro | 19:00h | ESCOLA DE PINO (COSPEITO)
Comedia. Todos os públicos.
Autoría: Pepe Peinó
Dirección: Pepe Peinó
Duración: 55 min.
Sinopse:
O Nadal é tempo de paz, de esperanza, de felicidade, ilusión e luz. Frei Bombilla, o abade do Mosteiro da Luz é consciente disto e, coa axuda de Sor Luminiscencia, abadesa do Mosteiro do Resplandor, organiza o Primeiro Concurso de Luces de Nadal. O colorido, a intensidade, a brancura, incluso a luz da razón e a luz do corazón compiten por levar o premio, máis de novo triunfa o concursante máis inesperado. Paquiño sabe de verdade como iluminar o mundo.
Camping gas (OS TROCOS)
Sábado 9 de decembro | 20:00h | CENTRO SOCIOCULTURAL DE MOSTEIRO (POL)
Comedia. Todos os públicos.
Autoría: Iria Acevedo. Obra adaptada por Guillermo Cancelo.
Dirección: Guillermo Cancelo
Duración: 70 min.
Sinopse:
Un camping nas Rías Baixas en tempada alta. Música, baile, sol e praia. Unha dona con moito poder. Veraneantes que mesturan o amor, o desamor, o desexo, a corrupción e as envexas nun cóctel explosivo para refrescar un calor abafante. Don Félix Galván, concelleiro de urbanismo de “La Toja”, está inmerso nunha operación ilegal que implica a varias concellarías e tamén ao camping por cousas dun amor do pasado.
Aire fresco (ARDORA)
Domingo 10 de decembro | 20:00h | CASA DA CULTURA DO VALADOURO
Comedia. Todos os públicos.
Autoría: Francisco Piñeiro González
Dirección: Maria Paz Rodríguez Silva
Duración: 75 min.
Sinopse:
A crise da covid puxo de relevo problemas comúns, que todos temos na cotidianidade, pero que tenden a ser invisibilizados. As persoas maiores foron un dos colectivos máis afectados pola pandemia, dada a súa vulnerabilidade. Esta obra busca concienciar á sociedade sobre a necesidade urxente de prestar unha atención adecuada a quen cuidou e agora precisa ser coidado.
Pontenova Fassion Wii (LUME ESCÉNICO)
Sábado 9 de decembro | 20:00h | CENTRO SOCIOCULTURAL DE SAN COSME (BARREIROS)
Comedia. Todos os públicos.
Autoría: Guillermo Cancelo
Dirección: Guillermo Cancelo
Duración: 65 min.
Sinopse:
A deseñadora Carme Fouzas, natural da Pontenova, recibe o Premio Nacional de Deseño de Moda, ocasión que aproveita a alcaldesa dese Concello para organizar un desfile e, dese xeito, desviar a opinión pública local da maraña de corrupción urbanística na que se atopa. O traballo da deseñadora chama a atención do mesmísimo Benancio Hortera, o cal fará todo o que faga falta para que eses deseños formen parte da súa nova colección.
128 representacións de 31 compañías
A finais do mes de xuño arrancou o Circuíto de Teatro Afeccionado da Vicepresidencia da Deputación de Lugo, que se mantén en xira polas comarcas ata o 30 de decembro. Unha trintena de compañías teatrais e un total de 128 representacións, 40 máis que na anterior edición, sumaranse ao calendario de actividades dos concellos. Esta iniciativa está integramente financiada pola área de Cultura, que mantén así mantén o apoio ás artes escénicas e ofrece a asociacións e concellos a posibilidade de ampliar as súas axendas culturais.
As datas, horarios e lugares das representacións difúndense e actualízanse en cultura.deputacionlugo.gal
Ocorreu pasadas as 15:30 horas. Un traballador tivo que ser evacuado ao hospital logo de caerlle o tronco dunha árbore enriba mentres realizaba tarefas no monte en Cervo. Aínda que estaba liberado e consciente, precisaba asistencia sanitaria. Os profesionais de Urxencias Sanitarias de Galicia-061 trasladárono finalmente ao Hospital de Burela. Neste operativo tamén participaron a Garda Civil e a Policía Local de Cervo.
Subliñou o traballo colectivo, o papel do voluntariado e a participación de arredor de mil corredores. Tamén puxo en valor o impacto económico e social da proba e o apoio institucional que permite o seu crecemento, incluída a difusión en streaming que levou a CAMOVI e a Viveiro a todo o mundo.
Ás doce en punto, tres foguetes —un por cada palabra do nome oficial— foron lanzados desde O Castrodouro, capital histórica do termo municipal e orixe da localidade, pois alí, hai 806 anos, Afonso IX concedeu o título de vila e todo un distrito que administrar; episodio histórico do que deriva o nome do concello. Os veciños reunidos mostraron a súa satisfacción pola recuperación da denominación histórica, afirmando moitos deles que nunca deixaran de empregar o nome completo. Do mesmo xeito, os maiores agradeceron aos impulsores da iniciativa a restitución do topónimo que a historia legou ao municipio alfocés.
Viveiro, 20 de abril, 2026. A proba volveu converter Viveiro nun punto destacado do deporte e da convivencia, ademais de supoñer un impulso económico para o municipio. María Loureiro destacou que a Camovi “é un exemplo de colaboración e esforzo colectivo, que sitúa Viveiro no mapa e dinamiza a economía local”. O Partido Socialista lembra o seu apoio histórico á carreira e reafirma o seu compromiso para seguir contribuíndo ao seu crecemento. O PSOE agradece tamén á veciñanza a súa acollida e implicación, fundamentais para que o evento continúe medrando ano tras ano.
Castro destacou o labor da Asociación e o potencial da tradición do ferro como motor económico, social e cultural para Riotorto, subliñando a importancia de impulsar iniciativas que garantan futuro para estes oficios. A Deputación de Lugo mantén unha colaboración estable coa entidade, cunha achega de 14.000 euros. No marco deste apoio, a Asociación avanzou na documentación dos oficios do ferro, catalogando ferramentas, técnicas e a historia das antigas “ferrerías de monte”.
O responsable provincial destacou "o traballo realizado pola organización ao longo destes anos para consolidar unha proba deportiva de primeiro nivel, que atrae tanto deportistas do máximo nivel competitivo como participación popular"
