Os bombeiros liberan a unha muller atrapada dentro dun turismo encaixado baixo un camión na A-8 ao seu paso por Vilalba

Vilalba, 27 Maio, 2024, 2024. O accidente produciuse na A-8, punto quilométrico 581, sentido Asturias, pouco antes das cinco desta tarde.

Un camión e un turismo víronse implicados no choque, aínda que outros tres vehículos resultaron danados polos efectos do impacto, isto é, bateron contra os restos da mediana e do camión.

Con todo, unha persoa resultou ferida e foi evacuada con lesións importantes ao centro hospitalario de referencia. Para liberar a ferida, foi necesaria unha intervención conxunta dos Bombeiros de Vilalba e Eume, xa que a situación na que quedou o turismo (debaixo do camión) era moi complexa.

Así, os efectivos de ambos os dous parques formaron parte deste operativo, que puido activarse mediante as chamadas ao 112 Galicia de varias persoas que presenciaron o accidente. Ademais dos bombeiros, desde o Centro Integrado de Atención ás Emerxencias de Galicia, pediuse a colaboración dos axentes da Garda Civil de Tráfico e da Policía Local, dos membros do Servizo Municipal de Protección Civil de Vilalba e da agrupación de voluntarios, así como do persoal de limpeza e mantemento do Ministerio de Fomento, como titular da vía.

Por suposto, tamén acudiron os profesionais de Urxencias Sanitarias de Galicia-061 para atender a única ferida neste accidente, xa que o condutor do camión resultou ileso.