O Burela FS imponse ao Córdoba Patrimonio de la Humanidad (3-2)

Os tantos de Pitero e Rikelme, que anotou un dobrete, nos últimos seis minutos de partido déronlle a volta ao 1-2 co que se foron os andaluces ao descanso

Burela, 15 de febreiro, 2025. O Burela FS sumou a súa sexta vitoria da tempada nun gran partido ante o Córdoba Patrimonio de la Humanidad. Os mariñaos tiveron que remontar no segundo período despois dunha primeira metade con moito ritmo. Con este triunfo, os discípulos de David Rial acumulan xa 21 puntos e superan na táboa ao propio Córdoba Patrimonio de la Humanidad; co que iguala o goal average particular; ao Viña Albali Valdepeñas e ao Quesos El Hidalgo Manzanares, á espera do que fagan os de Juanlu Alonso no partido desta tarde.

O encontro comezou con moito ritmo e as primeiras ocasións foron para o equipo cordobés, que nos tres minutos iniciais de xogo probou a Kaluza por mediación de Titi del Rey, Víctor e Macedo. En todos os disparos meteu as mans o porteiro internacional polaco para evitar que se adiantasen os visitantes. Sacudiu a presión sobre a súa portería o Burela cunha dobre ocasión de Pitero no minuto 6. O canteirán rematou de cabeza un balón en longo de Kaluza e puxo en moitos apretos a Víctor, que logrou despexar case sobre a liña. No rexeite, o meta cordobés volvía aparecer para sacar coas pernas abaixo un novo remate do burelense e facíao de novo no minuto 8 para despexar un disparo seco e debaixo de Charly desde fóra da área.

O cadro local tería a súa gran oportunidade no minuto 11, cando o meta califal Víctor realizaba un mal pase e entraba de forma temeraria sobre Alberto vendo a tarxeta vermella. Juninho non aproveitaba a falta, pero os locais non deixaron escapar a oportunidade de adiantarse cun home máis. Rikelme, só no segundo pau, remataba a pracer un gran envío de Isma.

Coa igualdade en pista de novo, os branquiverdes non tardarían en igualar grazas a unha incursión do meta suplente Alarcón, que disparaba e o seu tiro era aproveitado por Titi del Rey no segundo pau para anotar o empate. Os locais non acusaron o golpe e tiveron o 2-1 dúas veces nos pés de Rikelme. Na primeira, nunha acción persoal, foise de todos os rivais que lle saíron ao paso, pero o seu remate cruzado diante de Alarcón íase por moi pouco. No segundo, xa no minuto 19, o meta cordobés sacaba unha gran man para imposibilitar o tanto do brasileiro. A pesar de que estaban a dominar os locais, os que se foron por diante ao intervalo foron os visitantes cun golazo de Titi del Rey, o gran protagonista dos califais en ataque. Un pase rápido de Arnaldo Báez deixaba só ao rosarino ante Kaluza e o arxentino non perdoaba cunha gran picadiña que superaba ao porteiro laranxa.

Os burelistas recuperáronse do golpe no descanso e asinaron un notable segundo tempo, no que acabaron asediando a meta do cadro andaluz e logrando a remontada. Con todo, a primeira ocasión foi branquiverde, cando Kaluza desbarataba cun bo pé o que podía ser o terceiro tanto de Titi do Rey. A partir de aquí, case todas as ocasións foron para os mariñaos.

O primeiro en ter o empate nos seus pés foi Araya, pero o seu remate logo dunha gran acción de Pitero atopábase co traveseiro. Dous minutos máis tarde era Isma o que buscaba sorprender cun taconazo de costas desde a frontal, pero estaba moi atento Alarcón baixo paus para deter en dous tempos. Entre ocasión e ocasión burelesa, Juanan tiña o terceiro para os cordobeses, pero resolvía moi ben Kaluza.

Co paso dos minutos, o Burela incrementaba a súa presión sobre a meta andaluza e Juninho e Campàs, que debutaba de laranxa en Vista Alegre, esixían ao meta do filial cordobesista con senllos potentes disparos. De novo Juninho tería unha dobre ocasión, pero primeiro era o cancerbeiro o que sacaba o perigo e logo entre Alarcón e a súa zaga enviaban o coiro lonxe do marco visitante. Charly e outra vez Juninho buscarían un empate que acabaría chegando no minuto 34 por mediación de Pitero. O canteirán aproveitaba un rexeite a un disparo de Rikelme para meter a biqueira e anotar o segundo.

Non se conformaron os locais coa igualada e fóronse a polo terceiro, que xa tivo Pitero un minuto máis tarde cun tiro ao pau, logo dunha gran parede entre Isma e Alberto, con servizo final do santiagués. Despois era Araya o que o probaba desde campo propio tras un mal pase de Alarcón nunha incursión do meta cordobés en territorio laranxa. Antes do 3-2, Kaluza repelía un man a man de Felipe Echavarría.

O tanto que ao cabo lle daría a vitoria ao Burela chegaba a menos de dous minutos da conclusión nunha gran xogada colectiva dos de David Rial. Isma conducía unha contra veloz, cedía o capitán para Charly e o coruñés poñíaa milimetricamente no segundo pau para que o brasileiro anotase o seu particular dobrete e puxese o 3-2 final no electrónico. No último minuto e medio buscaron o empate os califais con Juanan xogando de porteiro-xogador, pero só no último segundo conseguían trazar unha ocasión, pero o remate do propio Juanan íase ás nubes.

Ficha Técnica Burela FS 3-2 Córdoba Patrimonio de la Humanidad

Burela FS (3): Kaluza; Araya, Alberto, Rikelme, Isma -quinteto inicial-, Charly, Juninho, Pitero, Quelle e Marc Campàs.

Córdoba Patrimonio de la Humanidad (2): Víctor; Pablo del Moral, Arnaldo Báez, Macedo, Titi del Rey -quinteto inicial-, Juanan, Felipe Echavarría, Murilo, Mareco, Alarcón (ps), Gui Santos, Mykytuik, Cendán e Lluc.

Goles: 1-0, min. 13: Rikelme. 1-1, min. 14: Titi del Rey. 1-2, min. 20: Titi del Rey. 2-2, min. 34: Pitero. 3-2, min. 39: Rikelme.

Árbitros: Faubell Zaldívar e Lázaro Angulo (Aragón). Expulsaron con vermella directa ao meta cordobés Víctor por unha entrada temeraria sobre Alberto. Tamén amoestaron ao visitante Felipe Echavarría.

Incidencias: Encontro da décimo sétima xornada da Primeira División masculina disputado no pavillón de Vista Alegre diante duns 800 espectadores. Nos prolegómenos do partido conmemorouse o Día Mundial contra o Cancro e os futbolistas do Burela luciron os ‘Brazaletes da Esperanza’ da Asociación Española contra el Cancro.