Os socialistas da provincia de Lugo convocan o 5º congreso provincial o 10 de maio

O Comité Provincial aprobou as bases e o calendario desta cita congresual que acollerá a cidade de Lugo e que “marcará un momento clave para o socialismo lucense, consolidando o proxecto do partido na provincia e reforzando a súa estrutura para os vindeiros anos”

Lugo, 15 de marzo de 2025. O Comité Provincial do PSdeG-PSOE de Lugo celebrouse este venres á noite para aprobar as bases e o calendario do 5º Congreso Provincial Ordinario, que terá lugar o vindeiro 10 de maio na cidade de Lugo. Esta cita congresual marcará un momento clave para o socialismo lucense, consolidando o proxecto do partido na provincia e reforzando a súa estrutura para afrontar os retos dos próximos anos.

O Secretario Xeral provincial, José Tomé Roca, fixo un balance positivo do traballo desenvolvido pola actual Executiva Provincial, destacando os avances logrados neste período e poñendo en valor o esforzo de alcaldes, alcaldesas, concelleiros, concelleiras e militantes socialistas en toda a provincia. “O noso partido leva anos demostrando que é a mellor ferramenta para transformar a sociedade e mellorar a vida da xente. Fixémolo desde os gobernos municipais, desde as institucións provinciais e tamén dende a oposición, sempre con responsabilidade, con proxectos sólidos e con liderados fortes”, destacou.

Ademais, durante o Comité gardouse un minuto de silencio en recordo da recentemente falecida Alcaldesa de Lugo, Paula Alvarellos, como mostra de respecto e recoñecemento ao seu compromiso co socialismo e coa cidade de Lugo.

Tomé subliñou a forza, a ilusión e as ganas coas que o partido afronta esta nova etapa, reafirmando a súa vontade de seguir traballando para que o PSdeG-PSOE siga sendo a referencia da esquerda na provincia Lugo. “Temos un proxecto solvente, temos equipo e temos a confianza da xente. Agora toca seguir traballando con responsabilidade e compromiso para seguir avanzando”, asegurou.

O Congreso Provincial

Este 5º Congreso Provincial chega poucos días despois da celebración do Congreso Nacional do PSdeG-PSOE, que tivo lugar a pasada fin de semana en Santiago de Compostela e que supuxo a consolidación do liderado de José Ramón Gómez Besteiro á fronte do socialismo galego. Tomé quixo recoñecer o éxito deste congreso autonómico, que serviu para reforzar a unidade do partido en Galicia e marcar unha folla de ruta clara para os próximos anos. Ademais valorou o peso da provincia na Comisión Executiva e no Comité Nacional.

“Besteiro inaugurou un tempo novo para o PSdeG, un tempo de unidade, de ilusión e de fortaleza. O seu liderado sólido e a súa visión estratéxica son clave para que o socialismo galego siga avanzando e para que sigamos sendo a referencia política que pode ofrecer solucións reais aos problemas da xente. Agora, con este Congreso Provincial en Lugo, seguimos ese camiño de renovación e impulso que nos permitirá consolidar o noso proxecto progresista en toda Galicia”, afirmou Tomé.

Segundo destacou, o obxectivo deste proceso congresual é reforzar a organización na provincia, fortalecer o proxecto socialista e preparar a estrutura do partido para os retos electorais que están por diante, tanto a nivel municipal como autonómico e estatal. “Somos un partido con historia, con valores e con compromiso. E temos claro que só desde a unidade, desde o traballo conxunto e desde a política útil podemos seguir sendo a referencia da esquerda en Lugo e en Galicia”, engadiu.

Tamén se aproveitou o encontro para valorar e animar ao novo alcalde de Lugo, Miguel Fernández, quen asume esta nova responsabilidade con forza e compromiso polo proxecto socialista na cidade. Do mesmo xeito, expresouse o apoio firme á nosa compañeira de Viveiro, María Loureiro, vítima dunha moción de censura froito dunha traizón do grupo Por Viveiro, que, malia definirse como progresista, deu o seu apoio ao Partido Popular. O PSdeG-PSOE de Lugo manifestou o seu respaldo incondicional a Loureiro e denunciou esta manobra como unha traizón aos valores progresistas e á vontade da cidadanía de Viveiro.

Calendario do proceso congresual

O calendario aprobado establece que o proceso congresual comezará coa presentación de precandidaturas ás primarias entre os días 24 e 28 de marzo, seguido do período de recollida de avais ata o 7 de abril. A primeira volta das primarias para elixir a Secretaría Xeral Provincial terá lugar o 27 de abril, coincidindo coa elección de delegados e delegadas ao Congreso, e en caso de ser necesaria unha segunda volta, celebrarase o 4 de maio.

Ademais, as agrupacións municipais poderán presentar emendas ao Relatorio Marco ata o 27 de abril, e a memoria final de emendas será remitida aos delegados/as entre os días 5 e 6 de maio.

O 5º Congreso Provincial do PSdeG-PSOE de Lugo, que se celebrará o 10 de maio, supón unha oportunidade para fortalecer a organización e marcar as liñas estratéxicas do socialismo lucense para os próximos anos. “O Partido Socialista sempre foi a mellor ferramenta para transformar a sociedade, e en Lugo estamos preparados para seguir avanzando con máis forza ca nunca”, asegurou Tomé.

Un partido unido, con proxecto e con futuro

José Tomé Roca concluíu a súa intervención facendo un chamamento á participación activa da militancia neste proceso congresual, co obxectivo de seguir reforzando o proxecto socialista en Lugo e en Galicia. “Este é un partido democrático, onde as decisións as toma a militancia e onde cada compañeiro e cada compañeira ten un papel fundamental. Por iso, este Congreso non só servirá para elixir unha nova dirección, senón que será unha gran oportunidade para debater ideas, para compartir propostas e para marcar o rumbo do socialismo lucense nos próximos anos”, destacou.

Finalmente, Tomé enviou unha mensaxe clara á militancia: “Temos un partido unido, con liderado, con proxecto e con futuro. Este Congreso Provincial será clave para seguir construíndo unha provincia máis xusta, máis igualitaria e con máis oportunidades para todos e todas. O mellor está por vir e o PSdeG-PSOE estará á altura dos retos que temos por diante.”