A Corporación provincial acordou por unanimidade o texto realizado con motivo do Día Internacional contra a explotación sexual e a trata de mulleres, nenas e nenos; e outro na defensa da convivencia, a seguridade e o respecto a todas as persoas
Lugo, 29 de xullo de 2025. A Corporación Provincial acordou este martes na sesión plenaria dúas Declaracións Institucionais: unha delas realizada con motivo do Día Internacional contra a explotación sexual e a trata de mulleres, nenas e nenos -que se celebrará o vindeiro 23 de setembro-; e outra na que a institución provincial pon de manifesto o “firme compromiso” de acadar unha sociedade baseada no respecto a lei e a convivencia. Todos os grupos políticos con representación na Deputación de Lugo -PSdeG, BNG e PPdeG- acordaron aprobar ambos textos que pretenden erradicar calquera forma de violencia, discriminación e odio, e promover unha sociedade inclusiva e segura baseada na igualdade e nos dereitos humanos.
Ademais, a Deputación tamén amosa o seu apoio ás políticas públicas que protexen ás vítimas, fomentan os valores educacionais e fortalecen a cohesión social. Así mesmo, pon en valor a importancia de manter unha colaboración activa entre as administracións locais, as forzas de seguridade e a sociedade civil para construír un entorno libre de explotación, racismo e calquera forma de discriminación.
DECLARACIÓN INSTITUCIONAL POLA CONVIVENCIA, A SEGURIDADE E O RESPECTO A TODAS AS PERSOAS
Desde a Deputación Provincial de Lugo, manifestamos o noso firme compromiso cunha sociedade baseada no respecto, a lei e a convivencia.
Condenamos rotundamente calquera forma de racismo, violencia ou discurso de odio, así como calquera intento de dividirmos ou atacar a dignidade das persoas pola súa orixe, identidade ou crenzas.
As situacións vividas nos últimos días nalgúns municipios non representan o sentir maioritario dunha cidadanía que aposta pola paz e a inclusión. Por iso, reclamamos que se investigue a fondo o sucedido e, no caso de que existan responsabilidades, estas se asuman. Ningún delito de odio pode quedar sen resposta.
A xustiza é esencial, pero tamén o é o compromiso colectivo con políticas públicas que promovan a igualdade, a cohesión social e os Dereitos Humanos. Desde as entidades locais, debemos seguir impulsando espazos seguros e diversos onde todas as persoas poidan vivir con liberdade e dignidade.
Recoñecemos e valoramos o traballo das Forzas e Corpos de Seguridade, que cada día
protexen a nosa convivencia e garanten a seguridade que veciñas e veciños demandan, así como esiximos a dotación de medios e recursos suficientes que aseguren o mellor
desempeño do seu traballo.
Por todo iso, facemos un chamamento á unidade. Só desde o respecto mutuo, o cumprimento da lei e o compromiso común, construiremos pobos e cidades máis xustos, libres e seguros para todas e todos.
DECLARACIÓN INSTITUCIONAL CON MOTIVO DO DÍA INTERNACIONAL CONTRA A EXPLOTACIÓN SEXUAL E A TRATA DE MULLERES, NENAS E NENOS
A Deputación Provincial de Lugo súmase, un ano máis, á conmemoración do Día Internacional contra a Explotación Sexual e a Trata de Mulleres, Nenas e Nenos. Esta xornada interpélanos, como sociedade, a reforzar o noso compromiso contra unha das manifestacións máis graves de vulneración de dereitos humanos e dignidade persoal. A trata con fins de explotación sexual, así como a industria do sexo, constitúen realidades profundamente inaceptables, que atentan contra a liberdade, a seguridade e a igualdade entre persoas.
En España, os datos seguen sendo preocupantes. Segundo cifras do Ministerio do Interior, en 2024 identificáronse 632 vítimas de trata, das cales 376 foron sometidas a explotación sexual.
Entre elas atopábanse 15 nenas e 1 neno, e o 98% eran mulleres. Estas cifras evidencian o carácter marcadamente feminino destas formas de violencia, o que obriga os poderes públicos a actuar con determinación e firmeza.
Ningunha forma de explotación pode ter cabida nunha sociedade libre e democrática. O compromiso coa dignidade humana esixe desmantelar os factores que perpetúan a mercantilización do corpo, especialmente de mulleres, nenas e nenos. A trata non é un fenómeno illado: aliméntase da demanda, a pobreza, a falta de oportunidades e de situacións de especial vulnerabilidade social como a que sofren mulleres migrantes, racializadas, con discapacidade, LGTBI ou en risco de exclusión, e promover medidas que respecten a súa dignidade, dereitos e diversidade.As administracións públicas, e moi especialmente os Gobernos Locais, teñen unha responsabilidade directa na prevención, detección, protección e acompañamento das vítimas.
Desde a Deputación Provincial de Lugo, reafirmamos o noso compromiso co impulso de políticas públicas efectivas, cunha perspectiva integral de dereitos humanos, centrada nas vítimas e que priorice a erradicación destas formas de violencia. Neste sentido, consideramos necesario promover marcos normativos que dificulten que locais, plataformas dixitais ou actividades económicas poidan facilitar ou beneficiarse de situacións de explotación sexual, reforzando a vixilancia e o cumprimento da legalidade. Por todo iso, instamos a:
-Traballar con visión de futuro e promover unha educación baseada en valores de igualdade, dignidade e respecto, impulsando programas nos centros escolares que fomenten a concienciación temperá fronte a calquera forma de explotación, e que contribúan á transformación social necesaria para erradicar a trata.
-Fomentar unha conciencia crítica que rexeite o consumo de prostitución e combata as mensaxes que normalizan ou minimizan esta realidade.
-Consolidar redes locais de apoio que garantan o acceso a recursos habitacionais, sanitarios, xurídicos e laborais —fomentando espazos de formación e de emprego digno— que proporcionen alternativas reais para quen decida saír de situacións de explotación.
-Reafirmar o compromiso firme das nosas entidades locais coa igualdade de oportunidades, a xustiza social e a defensa dos dereitos fundamentais.
-Favorecer a participación activa de mulleres que superasen situacións de trata no deseño e avaliación de políticas públicas, recoñecendo a súa experiencia como elemento enriquecedor.
-Reforzar a cooperación internacional e o traballo en rede con municipios e entidades de países de orixe, orientando os esforzos á prevención da trata de raíz, ao intercambio de boas prácticas e ao desenvolvemento de proxectos que aborden as causas profundas da situación de vulnerabilidade e risco.
Hoxe, 23 de setembro, expresamos o noso rexeitamento firme e decidido á trata e á explotación sexual de mulleres, nenas e nenos, e renovamos o noso compromiso coa construción de municipios seguros, inclusivos e libres de toda forma de violencia. Cada paso que deamos nesta dirección será unha contribución a un futuro máis digno no que ningunha muller, nena ou neno sexa xamais tratado como unha mercadoría.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
Pasada a medianoite, un vehículo saíuse da vía na N-634. Como consecuencia do impacto, tres persoas resultaron feridas. Da asistencia sanitaria ocupáronse os profesionais de Urxencias Sanitarias de Galicia-061 e os axentes da Garda Civil de Tráfico da seguridade na vía. Os Bombeiros de Barreiros tamén acudiron, sen embargo, ningún dos feridos estaba atrapado.
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
